प्रभात वृत्तसेवा पुणे – महापालिकेच्या माध्यमातून केवळ प्राथमिक, माध्यमिक नव्हे, तर अभियांत्रिकी, औषधनिर्माणशास्त्र आणि व्यवस्थापनशास्त्राचे उच्च दर्जाचे व्यावसायिक शिक्षण सर्वसामान्य विद्यार्थ्यांना मिळावे, यासाठी कटिबद्ध आहे, अशी ग्वाही भारतीय जनता पक्षाच्या प्रभाग क्र. १२ (छत्रपती शिवाजीनगर-मॉडेल कॉलनी) मधील उमेदवार प्राचार्या डॉ. निवेदिता गजानन एकबोटे यांनी दिली. प्रचारादरम्यान नागरिकांशी संवाद साधताना त्यांनी आपल्या शैक्षणिक व्हिजनचा रोडमॅप मांडला.डॉ. एकबोटे म्हणाल्या, की भारतरत्न अटल बिहारी वाजपेयी वैद्यकीय महाविद्यालयाच्या धर्तीवर महापालिकेची स्वतःची व्यावसायिक महाविद्यालये सुरू करण्यासाठी आपण प्रयत्नशील राहणार आहोत. यामुळे शहरातील गोरगरीब विद्यार्थ्यांना परवडणारे आणि दर्जेदार शिक्षण उपलब्ध होईल. पुणे शहरात शिक्षणासाठी येणाऱ्या बाहेरील विद्यार्थ्यांच्या निवासाचा आणि भोजनाचा प्रश्न सोडविण्यासाठी महापालिकेच्या निधीतून स्वतंत्र ‘वसतिगृह संकुल’ उभारण्यावर आपला भर असेल.प्रोग्रेसिव्ह एज्युकेशन सोसायटीतील माझ्या प्रदीर्घ अनुभवाचा फायदा महापालिका शाळांचा दर्जा उंचावण्यासाठी होईल. शाळांचे आधुनिकीकरण, मोफत शालेय साहित्य आणि शिष्यवृत्ती योजनांचा विस्तार हे माझे प्रमुख उद्दिष्ट आहे, असेही त्यांनी नमूद केले. माजी नगरसेविका डॉ. ज्योत्स्ना एकबोटे यांनी सुरू केलेले १००० विद्यार्थी क्षमतेचे ‘सिटी लायब्ररी’चे काम पूर्णत्वास नेण्याचा निर्धारही त्यांनी व्यक्त केला. विश्रामबाग, संभाजी सोसायटी, जंगली महाराज सोसायटी, शिवाजीनगर तोफखाना परिसर, श्री साईबाबा मंदिर परिसरात काढलेल्या पदयात्रेत उमेदवार डाॅ. एकबोटे यांच्यासह डॉ. नंदकुमार एकबोटे, स्वाती लोखंडे, विवेक शिंदे, शैलेश बडदे, किरण अस्तगावकर, श्रावण पाठक, युवराज गवळी, अनिकेत तिवारी, तुषार क्षीरसागर, विकी क्षीरसागर, यांच्यासह मित्रपक्षाचे विविध पदाधिकारी कार्यकर्ते मोठ्या संख्येने उपस्थित होते.
