प्रभात वृत्तसेवा पुणे – मतदान कोणालाही केले, तरी संबंधित मतदान कमळालाच जात असल्याची तक्रार केल्यानंतर मनसेचे उमेदवार गणेश भोकरे आणि राष्ट्रवादीच्या उमेदवार ॲड. रूपाली ठोंबरे यांनी भेट दिली आणि त्याठिकाणीच्या तांत्रिक अडचणी प्रशासनाला ती दूर करायला लावल्या.यासंदर्भात मनसेचे उमेदवार गणेश भोकरे म्हणाले, आमच्या एका ताईने मतदान केले. यामध्ये कुठलेही बटण दाबले, तरी भारतीय जनता पक्षाला मत जात होते. त्यांनी अनेकवेळा मतदान करून पाहिले; परंतु केवळ कमळाच्या चिन्हासमोरील लाइट लागत होती. अशा प्रकारे २०० ते २५० मतदान झाले. यामध्ये मशिनमध्ये तांत्रिक बिघाड झाल्याचे लक्षात आले, तरीदेखील मशिन बदलण्यात आली नाही. त्यामुळे संबंधित प्रक्रियेवर माझा विश्वास राहिला नसून, यामध्ये अधिकाऱ्यांचे देखील संगनमत असल्याचा आरोप भोकरे यांनी केला.एकतर सर्वच प्रभागांतील याद्या फोडण्यात आल्या आहेत. त्यानंतर साडेसात वाजता मतदान सुरू होणे अपेक्षित असताना साडेनऊ ते पावणेदहाच्या दरम्यान सुरू करण्यात आले. त्यानंतर मशिन अ, ब, क, ड अशा क्रमाने लावणे अपेक्षित असताना ड, क, ब, अ अशा प्रकारे मशिन लावण्यात आल्या. त्यामुळे निवडणूक आयोगाचे डोके ठिकाणावर आहे का, असा प्रश्न पडला आहे, असे ऍड. ठोंबरे म्हणाल्या. काही मतदान केंद्रांवर कंट्रोल एरर, बॅलेट एरर आल्याचे अधिकारी सांगतात मग त्यांनी मशिन चेक का केल्या नाहीत, असा प्रश्न त्यांनी उपस्थित केला. दरम्यान, यासंदर्भातील लेखी तक्रार निवडणूक निर्णय अधिकाऱ्यांकडे केल्याचे तक्रारदारांनी सांगितले.
