प्रभात वृत्तसेवा पुणे – रामबाग काॅलनी- शिवतीर्थनगर प्रभागातील राष्ट्रवादी काँग्रेसचे अधिकृत उमेदवार हर्षवर्धन दीपक मानकर, तृप्ती नीलेश शिंदे आणि कांता नवनाथ खिलारे यांच्या प्रचारात मुसंडी मारली असून, पदयात्रा, कोपरा सभांना महिलांसह ज्येष्ठ नागरिक आणि तरुणांचा मोठा प्रतिसाद मिळत आहे. प्रभागात २४ तास उपलब्ध असणारे आणि नागरिकांचे कामाला प्राधान्य देणारे हर्षवर्धन मानकर लोकप्रतिनिधी म्हणून हवे आहेत, अशा भावना नागरिकांनी व्यक्त करून उमेदवारांना शुभेच्छा दिल्या. प्रभाग ११ मधील बाल युवक मित्रमंडळ, सुदर्शन क्रिकेट क्लब, हनुमाननगर, तसेच शिवसाई मित्रमंडळ, सुतारदरा परिसरातील नागरिकांशी कोपरा सभेद्वारे उमेदवारांनी संवाद साधत तेथील समस्या जाणून घेतल्या. प्रभागातील रस्ते, पाणीपुरवठा, स्वच्छता, आरोग्य, महिला सुरक्षेचे प्रश्न, तसेच मूलभूत नागरी सुविधांबाबत आणि पुढील काळातील विकासकामांच्या संकल्पाबाबतची हर्षवर्धन मानकर यांनी लोकउपयोगी भूमिका मांडली. प्रभागाच्या सर्वांगीण विकासासाठी नेहमीच तुमची खंबीर साथ असते, या वेळी राष्ट्रवादी काँग्रेसच्या सर्वच उमेदवारांना एकजुटीने साथ द्या, असे आवाहन मानकर यांनी उपस्थित नागरिक आणि तरुणांना केले.या वेळी उमेदवारांप्रती असलेले प्रेम, आपुलकी नागरिकांनी केलेल्या गर्दीवरून दिसून आली. महिलांनी उमेदवारांचे औक्षण करत, भाऊंनी आमच्या कुटुंबाला आधार दिला. शिक्षण, रोजगाराची संधी देत योजनांचा लाभ मिळवून दिला. प्रभागातील विकासकामांना गती मिळाली. आता आम्ही सर्व आपल्या पाठीशी आहोत, असा विश्वास कोपरा सभांना आलेल्या नागरिकांनी उमेदवारांना दिला.
