प्रभात वृत्तसेवा पुणे – महापालिका निवडणुकीसाठी राष्ट्रवादी काँग्रेसपक्षाकडे सुमारे ६०० पेक्षा अधिक इच्छुकांनी अर्ज भरले आहेत. तसेच अर्जांची संख्या अधिक असल्याने अर्ज स्विकारण्यासाठी पक्षाकडून शुक्रवारी (दि. १९) दुपारपर्यंत मुदतवाढ दिली आहे. तर, या इच्छुकांच्या मुलाखतींसाठी पक्षाचे राष्ट्रीय अध्यक्ष अजित पवार स्वत: उपस्थित राहणार असल्याची माहिती पक्षाच्या कार्याध्यक्षा अॅड. रूपाली पाटील यांनी दिली. शहराध्यक्ष सुभाष जगताप यावेळी उपस्थित होते. पुढील दोन ते तीन दिवसांत या मुलाखती घेतल्या जाणार असून त्याचे वेळापत्रक इच्छुकांना कळविण्य़ात येणार असल्याचे पक्षाकडून स्पष्ट् करण्यात आले. उमेदवारी अर्जासोबत सर्वाधिक २० हजार रुपयांचे शुल्क पक्षाकडून आकारण्यात आले होते. त्यानंतरही जवळपास ६०० पेक्षा अधिक जणांनी अर्ज सादर केले आहेत. त्यामुळे, महापालिकेसाठी पक्षाला मोठ्या प्रमाणात प्रतिसाद मिळत असल्याचेही पाटील यांनी सांगितले.
