मांडवगण फराटा (प्रतिनिधी) : पुणे महानगरपालिका (PMC) निवडणुकीसाठी आज, १५ जानेवारी २०२६ रोजी मतदान सुरू असताना, शिरूर तालुक्याच्या पूर्व भागात मतदार याद्यांमधील गंभीर दुबार नावांचा घोळ समोर आला आहे. वाघोली (पुणे महापालिका हद्दीतील) मतदार यादीत शिरूर तालुक्यातील ग्रामीण गावांतील अनेक मतदारांची नावे दुबार आढळून आल्याने निवडणूक यंत्रणेवर संशयाचे वातावरण निर्माण झाले आहे. मांडवगण फराटा, तळेगाव ढमढेरे, वडगाव रासाई, इनामगाव, निर्वी, बाभुळसर बुद्रुक, पिंपळसुटी, तांदळी आदी गावांतील ग्रामस्थांची नावे ग्रामपंचायत मतदार यादीत असतानाच वाघोली प्रभागातील यादीतही नोंदवली गेली आहेत. या पार्श्वभूमीवर रात्रीच्या सुमारास अज्ञात व्यक्तींनी या गावांमध्ये धमकीवजा फ्लेक्स बोर्ड लावले, ज्यावर “वाघोलीला मतदानासाठी आलात तर रडस्तोर मारून पोलिसांच्या हवाली केले जाईल” असा थेट आणि आक्षेपार्ह इशारा देण्यात आला आहे. या फ्लेक्सवर काही ठराविक मतदारांची नावेही झळकल्याने संबंधित कुटुंबांमध्ये भीती, संताप आणि तीव्र नाराजी पसरली आहे. फ्लेक्स लावल्यानंतर काही वेळातच ते काढून टाकण्यात आले, तरीही परिसरात तणावाचे वातावरण कायम आहे. ग्रामस्थ आणि स्थानिक प्रतिनिधींनी सांगितले की, सर्व मतदार याद्या ऑनलाइन आणि संगणकीकृत असताना अशा दुबार नावे वर्षानुवर्षे कशा टिकून राहतात? यामागे निवडणूक यंत्रणेच्या कार्यपद्धतीत गंभीर त्रुटी असल्याचा आरोप होत आहे. पुणे महापालिकेच्या विस्तारित हद्दीत (विशेषतः वाघोली, खराडी, लोहगाव प्रभाग) अशा दुबार नावांचा मुद्दा मागील काही दिवसांपासून चर्चेत आहे, आणि यावेळी तो उघडकीस आला आहे. ग्रामस्थांच्या काय आहेत मागण्या? – दुबार मतदार नावे तातडीने रद्द करावीत. – यामागील दोषी अधिकाऱ्यांची सखोल चौकशी करून कठोर कारवाई करावी. – मागील निवडणुकांमध्ये अशा दुबार नावांवर मतदान झाले असल्यास त्याचीही तपासणी करावी. धमकी देणारा अज्ञात व्यक्ती कोण? त्यांना ही माहिती कोठून मिळाली? यामागे कोणाचा राजकीय डाव आहे? असे अनेक प्रश्न अद्याप अनुत्तरित आहेत. प्रशासन निवडणूक काळात अशा उघड धमक्यांकडे बघून गप्प का राहते, असा संतप्त सवाल ग्रामस्थ उपस्थित करत आहेत. या घटनेमुळे शिरूरच्या पूर्व भागात निवडणूक वाद चिघळण्याची आणि कायदा-सुव्यवस्थेचा प्रश्न निर्माण होण्याची शक्यता वर्तवली जात आहे.
