प्रभात वृत्तसेवा पुणे : महाविकास आघाडी म्हणून काँग्रेस, राष्ट्रवादी काँग्रेस शरदचंद्र पवार पक्ष आणि शिवसेना उद्धव बाळासाहेब ठाकरे पक्ष यांनी महापालिका निवडणूक लढविण्याच्या हालचाली सुरू असतानाच, पुण्यात दोन्ही राष्ट्रवादी एकत्र येण्याची चर्चा जोर धरू लागली आहे. मात्र, ही घडामोड घडणार की नाही याबाबत राष्ट्रवादी काँग्रेस शरदचंद्र पवार पक्षाने थेट काँग्रेसकडे बोट दाखवले आहे. महाविकास आघाडीमध्ये शिवसेना उद्धव बाळासाहेब ठाकरे पक्षाला काँग्रेसचा विरोध नसला तरी मनसे आघाडीत आल्यास काँग्रेसचा विरोध असल्याचे सांगण्यात येत आहे. महाविकास आघाडीबाबत काँग्रेसने वेगळी भूमिका घेतल्यास आम्हालाही इतर पर्यायांचा विचार करावा लागेल, असे सूचक विधान राष्ट्रवादी काँग्रेस शरदचंद्र पवार पक्षाचे प्रदेशाध्यक्ष शशिकांत शिंदे यांनी पुण्यात बोलताना केले. यामुळे महाविकास आघाडीच्या पालिका निवडणुकीतील भवितव्याबाबत संभ्रमाचे वातावरण निर्माण झाले आहे. याचवेळी, अजित परावारांच्या राष्ट्रवादीला आघाडीत घेण्यासाठी काॅग्रेसची नेमकी भूमिका काय आहे, अशी विचारणा शिंदे यांनी शहरातील पदाधिकाऱ्यांकडे केल्याचे समजते. त्यामुळे अप्रत्यक्षपणे काँग्रेसकडूनच दोन्ही राष्ट्रवादींच्या एकत्रीकरणावर शिक्कामोर्तब करून घेण्याचा डाव सुरू असल्याची चर्चा सुरू झाली आहे. राशपची काँग्रेस – शिवसेनेला विचारणा सूत्रांच्या माहितीनुसार, प्रदेशाध्यक्ष शशिकांत शिंदे यांनी काँग्रेस तसेच शिवसेनेच्या स्थानिक पदाधिकाऱ्यांशी संवाद साधला. या वेळी त्यांनी, अजित पवारांना सोबत घेतल्यास आघाडी होईल का, असा थेट प्रश्न उपस्थित केला. तसेच मनसेला आघाडीत घेण्याबाबत काय भूमिका आहे, अशी विचारणाही केली. यावर काॅग्रेसकडून, आम्ही सध्या आघाडी म्हणून राष्ट्रवादी काॅग्रेस शरदचंद्र पवार पक्ष आणि ठाकरे सेनेसोबत चर्चा करत आहोत. राष्ट्रवादी किंवा मनसेचा कोणताही प्रस्ताव आमच्याकडे आलेला नाही. तो प्रस्ताव राशपकडे आलेला आहे. त्यामुळे तुमचा निर्णय आम्हाला कळवावा, त्यानंतर आम्ही निर्णय घेऊ, अशी भूमिका मांडण्यात आली. शिवसेनेकडूनही साधारणपणे हीच भूमिका घेण्यात आली. त्यामुळे राशपकडून आधी आघाडीतील घटक पक्षांची भूमिका स्पष्ट होण्याची प्रतीक्षा करत आहे. “तूर्तास आमची आघाडी ही राष्ट्रवादी काँग्रेस शरदचंद्र पवार पक्ष, ठाकरे सेना आणि काँग्रेससोबत आहे. दोन्ही राष्ट्रवादी एकत्र येणे किंवा मनसे-शिवसेना एकत्र येणे, याचा आमच्याशी थेट संबंध नाही. त्यांचा निर्णय झाल्यानंतर, आमच्याकडे प्रस्ताव आल्यावरच फायदा-तोटा पाहून काॅग्रेसची भूमिका ठरवू. ज्यांचा प्रस्तावच नाही, त्यावर बोलण्यात अर्थ नाही.” – अरविंद शिंदे (काँग्रेस शहराध्यक्ष) “महाविकास आघाडीबाबतचा अंतिम निर्णय वरिष्ठ पातळीवर घेतला जाईल. आमची मनसेसोबत चर्चा सुरू आहे, मात्र अद्याप कोणताही निर्णय झालेला नाही. आम्ही आघाडी म्हणूनच लढणार, यावर एकमत झाले आहे. दोन्ही राष्ट्रवादी एकत्र येण्याचा निर्णय हा पूर्णपणे राष्ट्रवादीचा आहे. जर-तरला राजकारणात किंमत नसते. त्यांनी त्यांचा निर्णय घ्यावा. आम्हाला जे आदेश मिळतील, त्यानुसारच भूमिका असेल.” – गजानन थरकुडे (ठाकरे सेना, शहर प्रमुख)
