प्रभात वृत्तसेवा पुणे – समविचारी पक्षांच्या मताची विभागणी झाल्यानंतर उमेदवार निवडून येण्यास अडचण येते. जर मताची विभागणी झाली नाही, तर निवडून यायला सोपे जाते. त्यामुळे राष्ट्रवादी काँग्रेस आणि राष्ट्रवादी काँग्रेस शरदचंद्र पवार पक्ष हे पक्ष एकत्र पालिका निवडणूक लढविण्याबाबत तेथील शहराध्यक्ष निर्णय घेतील, असे राष्ट्रवादी काँग्रेस पक्षाचे राष्ट्रीय अध्यक्ष तथा उपमुख्यमंत्री अजित पवार यांनी रविवारी सांगितले. त्यांच्या या विधानामुळे पुणे आणि पिंपरी-चिंचवड महापालिकेसाठी दोन्ही पक्ष एकत्र येण्याबाबत संभ्रमावस्था कायम आहे.बारामती हॉस्टेल येथे राष्ट्रवादी काँग्रेस पक्षाकडून महापालिकेच्या निवडणुकीसाठी इच्छुकांच्या मुलाखती पवार यांच्या उपस्थितीत झाल्या. या वेळी त्यांनी माध्यमांशी संवाद साधला. सुरुवातीस नगरपंचायत आणि नगरपालिकांच्या निवडणुकीत पक्षाला मिळालेल्या यशाबद्दल त्यांनी मतदारांचे आभार मानले. ते म्हणाले, की राष्ट्रवादी काँग्रेसला चांगल्या जागा मिळाल्या, चांगले नगराध्यक्ष निवडून आले. भाजप आणि शिवसेनेलाही चांगले यश मिळाले आहे. या वेळी दोन्ही राष्ट्रवादीच्या एकत्रित निवडणुका लढविणार का, असा प्रश्न विचारला असता पवार यांनी सांगितले, की यापूर्वी 15 वर्षे आघाडीत एकत्र काम करत होतो. काँग्रेस सोबत असताना स्थानिक आघाडी करण्याचा अधिकार त्या- त्या जिल्ह्यातील पदाधिकाऱ्यांना दिला होता. आताही हा अधिकार त्या जिल्ह्यांना दिला आहे. आम्ही महायुतीत असलो, तरी भाजपला, शिवसेनेला त्यांच्या कार्यकर्त्यांना अधिक संधी द्यायची आहे. आम्हालाही आमच्या कार्यकर्त्यांना अधिक संधी द्यायची आहे. मात्र गप्प बसणार नाही भाजपने नुकतेच शहरातील राष्ट्रवादी काँग्रेसचे आजी-माजी पदाधिकारी, माजी नगरसेवक यांचा पक्षप्रवेश करून घेतल्याबाबत विचारले असता पवार म्हणाले, की यापूर्वी महायुतीतील पक्षांमध्ये एकमेकांचे आजी- माजी पदाधिकारी घ्यायचे नाही, असे ठरले होते. मात्र, आता पक्षप्रवेश झाला आहे. यासंदर्भात मुख्यमंत्र्यांशी एक-दोन दिवसांत चर्चा करू. उमेदवार दुसऱ्या पक्षातून घेतल्यावर मूळ पक्षातील लोक नाराज होणार, तेदेखील संधी शोधतील. या निर्णयाबद्दल मी नाराज नाही. मात्र, अशा वेळी दुसराही गप्प बसत नाही, असे म्ह्टल जाते, असे सांगत पवार यांनी युतीमधील आजी-माजी पदाधिकारी आगामी काळात पक्षात घेणार असल्याचे संकेत दिले. पवार म्हणाले की, केंद्रीय गृहमंत्री अमित शहा यांची धनंजय मुंडेंनी घेतलेली भेट पूर्वनियोजित होती. कारखान्याला मदत करण्यासंदर्भात ही भेट होती. मंत्रिपद कोणाला द्यायचे, याचा निर्णय मुख्यमंत्री यांचा असतो.कोणत्याही पक्षातील पदाधिकारी चुकीचे काम करत असेल, त्याची गय न करण्याचे आदेश पोलिसांना दिले आहेत. तर राहिलेल्या जागा माझ्या भाजपने शहरातील नगरसेवक पदाच्या 125 जागांवर विजयी होणार असल्याचा दावा केला आहे. तर तुम्हाला किती जागा मिळणार, याबाबत विचारले असता पवार यांनी उर्वरित जागा माझ्या, असे मिश्किल उत्तर दिले.
