प्रभात वृत्तसेवा तळेगाव ढमढेरे – शिरूर तालुक्यातील राजकारणाचा कणा मानल्या जाणाऱ्या तळेगाव ढमढेरे जिल्हा परिषद गटात सध्या राजकीय हालचालींना उधाण आले असून निवडणुकीपूर्वीच मोठ्या राजकीय भूकंपाची चाहूल लागली आहे. या आठवड्यात जिल्हा परिषद व पंचायत समितीचा निवडणूक कार्यक्रम जाहीर होण्याची शक्यता असल्याने पडद्यामागील राजकारण, गुप्त बैठकांचे सत्र आणि जुन्या वैरांना पुन्हा उजाळा मिळताना दिसत आहे. या गटातील प्रत्येक हालचाल आता संपूर्ण तालुक्याच्या चर्चेचा विषय ठरत आहे.या गटात प्रमुख राजकीय पक्षांचे वजनदार पदाधिकारी आणि माजी लोकप्रतिनिधी सक्रिय असल्याने चुरस वाढली आहे. ग्रामपंचायत, सोसायटी आणि बाजार समितीच्या निवडणुकांमध्ये दिसणारी गटातटाची खेचाखेची आता थेट जिल्हा परिषद निवडणुकीत परावर्तित होत आहे. आपला माणूस पुढे नेण्याच्या स्पर्धेत स्थानिक नेते एकमेकांसमोर उभे ठाकल्याचे चित्र असून, याचा परिणाम पक्षीय संघटनात्मक ताकदीवर होताना दिसत आहे.जानेवारी अखेरपर्यंत निवडणूक घेणे प्रशासनासाठी गरजेचे आहे, अन्यथा दहावी-बारावीच्या परीक्षांमुळे कार्यक्रम पुढे ढलावा लागेल. निवडणूक लांबणीवर पडल्यास इच्छुकांचे आर्थिक गणित बिघडेल, कार्यकर्त्यांचे मनोबल ढासळेल अशा अनेक कारणास्तव अनेक जण वेळेवर निवडणुका व्हाव्यात यासाठी आतूर आहेत. मागील निवडणुकीची जखम अजून ताजी मागील पंचवार्षिक निवडणुकीत जिल्हा परिषद व दोन्ही पंचायत समिती सदस्य अपक्ष निवडून येणे, ही घटना आजही राजकीय पक्षांसाठी चिंतेची बाब आहे. उमेदवारीवरून झालेली गटबाजी आणि समन्वयाच्या अभावामुळे पक्षांची ताकद कोलमडली होती. हीच पुनरावृत्ती टाळण्यासाठी यंदा वरिष्ठांकडून प्रयत्न सुरू असले, तरी स्थानिक पातळीवरील असंतोष अजूनही कायम आहे. इच्छुकांची रांग, अपक्ष पर्यायांची कुजबुज सध्या प्रत्येक पक्षात इच्छुकांची संख्या मोठी असून त्यांनी जनसंपर्क सुरू केला आहे. मात्र, अधिकृत उमेदवारीची खात्री नसल्याने अनेकांमध्ये अस्वस्थता आहे. तिकीट नाकारले गेल्यास अपक्ष म्हणून निवडणूक रिंगणात उतरण्याची कुजबुज सुरू झाल्याने राजकीय पक्षांसमोरील डोकेदुखी वाढली आहे.
