प्रभात वृत्तसेवा वडगाव निंबाळकर – जिल्हा परिषद व पंचायत समिती निवडणूक बिगुल वाजल्यानंतर उमेदवारांमध्ये रस्सीखेच चालू होती. परंतु उमेदवारी अर्ज भरण्याची शेवटची तारीख असल्यामुळे बारामती पंचायत समिती, झेडपी निवडणुकीत इच्छुकांनी आपापल्या पक्षांसह मित्रपक्ष व अपक्षांनी उमेदवारी अर्ज भरून दिले आहेत.आज काही पक्षांनी आपल्या मर्जीतील तर काहींनी निवडणुकी आधीच फिल्डिंग लावून उमेदवारी निश्चित केली होती. अर्ज भरण्याची शेवटची तारीख असल्याने उमेदवारांना एबी फॉर्म देऊन पक्षाची उमेदवारी निश्चित केली तर निष्ठावंत कार्यकर्त्यांमध्ये संपूर्ण नाराजी तयार केली असल्याचे बोलले जात आहे. वडगाव निंबाळकर- मोरगाव झेडपी गटामध्ये राष्ट्रवादी काँग्रेस पक्षाकडून मोरगावच्या रोहिणी संदीप कदम (ढोले) यांना तर बहुजन समाज पक्षाकडून मुर्टी येथील प्रा.अश्विनी रामदास खोमणे यांना उमेदवारी देऊन तगडे आव्हान तयार केले आहे. बारामती पंचायत समितीसाठी राष्ट्रवादी काँग्रेस पक्षाकडून वडगाव गणात जितेंद्र पवार तर बहुजन समाज पक्षाकडून बारामती विधानसभा अध्यक्ष दयानंद पिसाळ, भाजप फणसे तर मोरगाव गणात राष्ट्रवादी काँग्रेस पक्षाकडून रावसाहेब चोरमले तर भाजपकडून रामदास नवले या उमेदवारांनी आपापल्या पक्षांकडून उमेदवारी अर्ज दाखल केले आहेत. निष्ठावंत कार्यकर्त्यांची ऐनवेळी उमेदवारी नाकारल्यामुळे सर्वात जादा अर्ज अपक्षांनी दाखल केले आहेत. झेडपी व पंचायत समिती निवडणुकीत पाच वर्ष निष्ठेने काम करणाऱ्या कार्यकर्त्यांना पक्षाने नाकारल्यामुळे आम्ही वडगाव निंबाळकर मोरगाव गटामध्ये नव्याने इतर पक्षाचा उमेदवार निवडून आणून इतिहास घडविणार आहे, असे एका तरुण मतदारांनी सांगितले.
