Wagholi News : जिल्हा परिषद निवडणुकीत बोगस मतदान करणाऱ्या सहा जणांना पकडले. त्यांच्याकडून बनावट आधारकार्ड जप्त करण्यात आले. नगर रस्त्यावरील केसनंद भागात असलेल्या एका मतदान केंद्रावर ही घटना घडली. या प्रकरणी एका महिलेसह सहा जणांविरुद्ध गुन्हा दाखल करण्यात आला आहे. या प्रकरणात गुन्हा दाखल करण्यात आलेले आरोपी बांधकाम मजूर आहेत. ते सध्या केसनंद भागातील नियोजित गृहप्रकल्पाच्या आवारात राहायला आहेत. याबाबत पोलीस हवालदार बाळासाहेब हराळ यांनी वाघोली पोलीस ठाण्यात फिर्याद दिली आहे. पोलिसांनी दिलेल्या माहितीनुसार, जिल्हा परिषदेचे मतदान शनिवारी (७ फेब्रुवारी) पार पडले. केसनंद भागातील श्री जोगेश्वरी विद्यालयाच्या आवारातील मतदान केंद्रात तीन आरोपींनी मतदान केले. तीन जणांची मतदान केंद्रातील कर्मचाऱ्यांनी चौकशी केली. तेव्हा त्यांच्याकडे बनावट आधारकार्ड आढळून आले. पोलिसंनी सहा जणांना ताब्यात घेतले. या प्रकरणात गुन्हा दाखल करण्यात आलेले तीन आरोपी मूळचे उत्तर प्रदेशातील आहेत. उर्वरित तीन आरोपी वाशीम जिल्ह्यातील आहेत. गुन्हे शाखेच्या पोलीस निरीक्षक पल्लवी मेहेर पुढील तपास करत आहेत. केसनंद ग्रामस्थांची पोलिसांविरोधात नाराजी…. बनावट आधारकार्ड बाळगून मतदान करणाऱ्या बोगस मतदारांना नागरिकांनी पकडून दिले होते. मात्र गुन्हा दाखल करण्यासाठी वाघोली पोलिसांकडून वेळ लागत असल्याने ग्रामस्थांना पुणे पोलीस आयुक्तांशी संवाद साधून वाघोली पोलिसांची तक्रार करावी लागली. गुन्हा दाखल करण्यासाठी नागरिकांनी पोलीस ठाण्यात ठिय्या मांडला होता.काही काळ पोलीस ठाण्यात तणावाची परिस्थिती निर्माण झाली होती. रात्री उशिरा गुन्हा दाखल करण्यात आला आहे. केसनंद येथील मतदान केंद्रावर बोगस मतदारांना बनावट आधारकार्ड द्वारे मतदान करून घेण्यासाठी मोठे रॅकेट कार्यरत होते. त्याचे व्हिडिओ पुरावे आम्ही पोलिसांना दिले आहे. पोलिसांनी या प्रकरणी तातडीने तपास करून दोषींवर कडक कारवाई त्वरित करावी. याबाबत आम्ही ग्रामस्थ लवकरच आमदार माऊली कटके यांच्या उपस्थितीत पोलीस आयुक्तांची भेट घेणार आहोत. मिलिंद हरगुडे माजी सरपंच, केसनंद
