Pune ZP Election – पुणे जिल्हा परिषद निवडणुकीच्या पार्श्वभूमीवर कडूस-चास जिल्हा परिषद गटामध्ये राष्ट्रवादी काँग्रेस पक्षाच्या अधिकृत उमेदवारांनी प्रचाराचा जोरदार धडाका लावला आहे. प्रचारासाठी आता शेवटचे दोनच दिवस शिल्लक असताना, पक्षाच्या वतीने मतदारांशी थेट संवाद साधण्यावर भर दिला जात आहे. राष्ट्रवादी काँग्रेस पक्षाच्या जिल्हा परिषद गटाच्या उमेदवार वसुधा अंकुश राक्षे, कडूस पंचायत समिती गणाचे उमेदवार शंकर रघुनाथ कावडे आणि चास पंचायत समिती गणाच्या उमेदवार प्रियंका अभिजीत देवदरे यांनी कडूस आणि चास गणातील विविध वाड्यावस्त्यांवर घरोघरी जाऊन प्रचार केला.या प्रचार दौर्यादरम्यान त्यांना नागरिकांचा प्रचंड आणि उत्स्फूर्त प्रतिसाद पाहायला मिळाला. सद्यस्थितीत राष्ट्रवादी काँग्रेस पक्षाचे दिवंगत अजित पवार साहेब यांच्या अकाली निधनामुळे पक्ष एका दृष्टीने पोरका झाला असल्याची भावना कार्यकर्त्यांमध्ये आहे; मात्र यामुळेच मतदारांमध्ये पक्षाप्रति मोठी सहानुभूतीची लाट निर्माण झाली आहे. या कठीण काळात पक्षाशी एकनिष्ठ राहून, मतदारांनी येणार्या निवडणुकीत राष्ट्रवादी काँग्रेस पक्षाचा बालेकिल्ला समजला जाणार्या पुणे जिल्ह्यात पुन्हा पक्षाची सत्ता स्थापन करण्यासाठी पक्षाच्या उमेदवारांना विजयी करण्याचा निर्धार केला आहे.प्रचारादरम्यान नागरिकांनी, आम्ही निष्ठेच्या बाजूने उभे राहणार असून, आमचे प्रत्येक मत हे स्व. अजित पवार यांना श्रद्धांजली असेल आणि आमची पक्षाप्रति असणारी सहानुभूतीची भावना मतांच्या स्वरूपात पेटीत जमा होईल, असा विश्वास राक्षे यांनी व्यक्त केला आहे.
