Pune ZP Election – पुणे जिल्हा परिषद व इंदापूर पंचायत समिती निवडणुकीसाठी राष्ट्रीय सहकारी साखर कारखाना महासंघाचे अध्यक्ष व माजी मंत्री हर्षवर्धन पाटील यांनी शनिवारी सकाळी बावडा (ता. इंदापूर) येथे सहकुटुंब मतदानाचा हक्क बजावला.यावेळी पत्नी व नीरा-भीमा सहकारी साखर कारखान्याच्या अध्यक्षा भाग्यश्री पाटील, कन्या व बावडा-लुमेवाडी जि. प. गटाच्या राष्ट्रवादी काँग्रेसच्या उमेदवार अंकिता पाटील तसेच पुत्र राजवर्धन पाटील यांनीही मतदान केले. उपमुख्यमंत्री स्व. अजितदादा पवार यांच्या निधनामुळे दु:खद वातावरण असतानाही ही निवडणूक महत्त्वाची असल्याचे सांगत, शरद पवार यांच्या मार्गदर्शनाखाली स्व. अजितदादांची विकासाची विचारधारा पुढे नेण्यासाठी इंदापूर तालुक्यातील राष्ट्रवादी काँग्रेसचे सर्व 24 उमेदवार मोठ्या मताधिक्याने विजयी होतील, असा ठाम विश्वास पाटील यांनी व्यक्त केला.तसेच पुणे जिल्ह्यातही राष्ट्रवादी काँग्रेस सत्तेवर येईल, असा दावा त्यांनी केला. मतदानानंतर पाटील यांनी तालुक्यातील विविध मतदान केंद्रांना भेटी देत कार्यकर्त्यांशी संवाद साधला. मतदानाची टक्केवारी वाढविण्यासाठी कार्यकर्त्यांनी अधिक प्रयत्नशील राहावे, अशा सूचनाही त्यांनी दिल्या.
