Pune ZP Election – सर्वाधिक मतदानासाठी ओळखल्या जाणाऱ्या तळेगाव ढमढेरे परिसरात यंदाही लोकशाहीच्या उत्सवाला उत्स्फूर्त प्रतिसाद मिळाला असून एकूण ७२ टक्के मतदानाची नोंद झाली आहे. गावातील १३ हजार ७६७ मतदारांपैकी ९ हजार ९०१ मतदारांनी आपला हक्क बजावला. या उत्साही वातावरणात शुभम अनिल नरके आणि वधू गौरी हनुमंत भुजबळ या नवदांपत्याने लग्नाच्या कार्यक्रमातून वेळ काढत थेट मतदान केंद्रावर जाऊन आपला हक्क बजावला,ज्याचे सर्वत्र कौतुक होत आहे. तळेगाव ढमढेरे जिल्हा परिषद गटात भाजपच्या दिपाली राहुल गव्हाणे, राष्ट्रवादी काँग्रेसच्या रेखा मंगलदास बांदल, शिवसेनेच्या सारिका राहुल कर्पे आणि अपक्ष उमेदवार रेश्मा जयेश शिंदे यांच्यात मुख्य लढत झाली. तसेच पंचायत समिती गणातून भाजपच्या विद्या राजेंद्र भुजबळ, राष्ट्रवादीच्या शोभा महेश ढमढेरे आणि शिवसेनेच्या चेतना जयकुमार ढमढेरे यांचेही राजकीय भवितव्य आज मतपेटीत बंद झाले आहे.सकाळपासूनच युवक, महिला आणि ज्येष्ठ नागरिकांनी केंद्रावर गर्दी केली होती.विभागीय अधिकारी सुनील म्हस्के यांच्या मार्गदर्शनाखाली ही प्रक्रिया पार पडली. यावेळी मंडळ अधिकारी गणपत मरबळ, तलाठी आबासाहेब रुके, ग्रामविकास अधिकारी राजेंद्र सात्रस आणि पोलीस पाटील पांडुरंग नरके उपस्थित होते. पोलीस निरीक्षक दीपरत्न गायकवाड यांच्या मार्गदर्शनाखाली पोलीस उपनिरीक्षक महेश डोंगरे, किशोर तेलंग, श्रीमंत होणमाने आणि सचिन होळकर यांनी चोख बंदोबस्त ठेवल्याने संपूर्ण परिसरात शांततेत मतदान पार पडले. आता सर्वांचे लक्ष उद्या होणाऱ्या मतमोजणीकडे लागले आहे.
