Pune ZP Election 2026 – पुणे जिल्हा परिषद आणि राजगड पंचायत समितीच्या २०२५ च्या आगामी निवडणुकीसाठी उमेदवारांच्या वैध अर्जांची यादी प्रसिद्ध होताच तालुक्यात राजकीय खळबळ उडाली आहे. राजकीय पक्षांच्या अधिकृत उमेदवारांसोबतच ‘अपक्ष’ उमेदवारांनी मोठ्या संख्येने दंड थोपटल्याने अनेक दिग्गजांची झोप उडाली आहे. वेल्हे बु. गटात उमेदवारांचा पाऊस! सर्वात मोठी चुरस गट क्रमांक ५५ (वेल्हे बु.) मध्ये पाहायला मिळत आहे. येथे तब्बल १२ उमेदवार रिंगणात असून, त्यापैकी बहुतांश अपक्ष आहेत. विशेष म्हणजे प्रस्थापित पक्षांच्या उमेदवारांसमोर अपक्षांनी दिलेले आव्हान यामुळे येथील लढत अत्यंत रंगतदार होणार आहे. प्रस्थापितांमध्ये थेट संघर्ष विंझर विभाग (गट ५४): येथे भाजपचे शिवराज शेंडकर, शिवसेनेचे अनंता दारवटकर, राष्ट्रवादीचे अमोल नलावडे आणि काँग्रेसचे अक्षय मरळ यांच्यात चतुष्कोनी लढत पाहायला मिळणार आहे.पानशेत गण (१०७) : महिला राखीव प्रभागात भाजपच्या सीमा राऊत, राष्ट्रवादीच्या सुवर्णा राऊत आणि काँग्रेसच्या उज्वला पासलकर यांच्यात प्रतिष्ठेची लढाई होणार आहे. शिवसेनेच्या (ठाकरे गट) प्रतिक्षा जगताप यांनीही येथे आव्हान उभे केले आहे. ‘बंडखोरी’ की ‘रणनिती’? अनेक ठिकाणी एकाच आडनावाचे अनेक उमेदवार रिंगणात आहेत. वांगणी गण (१०९) मध्ये राष्ट्रवादीकडून संदीप खुटवड तर भाजपकडून विशाल वालगुडे आमनेसामने आहेत. तसेच वंचित बहुजन आघाडीनेही काही जागांवर प्रदीप कांबळे आणि दिलीप रणखांबे यांच्यासारखे उमेदवार उभे करून मुख्य प्रवाहातील पक्षांची डोकेदुखी वाढवली आहे.
