PMC Election Result – पुणे महापालिका निवडणुकीत प्रभाग क्रमांक तीन व चारमध्ये चुरशीच्या लढतीनंतर भाजपने वर्चस्व सिद्ध केले आहे. मतमोजणीअंती वाघोली परिसरात आठ जागांपैकी सात जागांवर भाजपच्या उमेदवारांना तर एका जागेवर राष्ट्रवादीच्या उमेदवाराला आघाडी मिळाल्याचे चित्र स्पष्ट झाले आहे.महापालिकेत नव्याने समाविष्ट झालेल्या वाघोलीचे प्रभाग तीन (विमाननगर-लोहगाव-वाघोली) आणि प्रभाग चार (खराडी-वाघोली) असे विभाजन करण्यात आले होते. यामध्ये सुमारे 65 टक्के मतदार प्रभाग चारमध्ये तर 35 टक्के मतदार प्रभाग तीनमध्ये होते. प्रभाग तीनमध्ये 31 तर प्रभाग चारमध्ये 50 मतदान केंद्रे होती. मतदानाच्या आकडेवारीवरून प्रभाग चारमध्ये काही प्रमाणात क्रॉस वोटिंग झाल्याचे दिसून आले. या प्रभागात भाजपच्या अ, ब व क जागांवर उमेदवारांना स्पष्ट आघाडी मिळाली असून ड जागेवर राष्ट्रवादीच्या उमेदवाराला अल्प मतांनी आघाडी मिळाली आहे; मात्र प्रभाग तीनमध्ये वाघोलीतील मतदारांनी भाजपच्या चारही उमेदवारांना मोठ्या प्रमाणात पसंती दिल्याचे मतमोजणीतून स्पष्ट झाले आहे. या निवडणुकीत वाघोलीतील स्थानिक उमेदवार रत्नमाला सातव, अनिल सातव आणि रामदास दाभाडे हे प्रथमच महापालिकेवर निवडून गेले. वाघोलीचे प्रतिनिधित्व करणारे तीन नगरसेवक आता प्रभाग तीन व चारमधील मूलभूत प्रश्न सोडवण्यासाठी महापालिकेत कार्यरत राहणार आहेत. एकूणच या निकालामुळे वाघोलीत भाजपचे राजकीय बळ वाढल्याचे चित्र असून आगामी काळात स्थानिक विकासकामांबाबत नागरिकांच्या अपेक्षा वाढल्या आहेत.
