प्रभात वृत्तसेवा बेल्हे – पारगाव तर्फे आळे (ता. जुन्नर) येथील रामवाडी परिसरात बिबट्याने मुलाचा बळी घेतल्याच्या घटनेनंतर वनविभागाने आक्रमक पावले उचलली आहेत. या परिसरात लावलेल्या पिंजऱ्यात सलग दुसऱ्या दिवशी, बुधवारी (दि. १७) पहाटेच्या सुमारास सुमारे ४ ते ५ वर्षे वयाची मादी बिबट जेरबंद झाली आहे. मंगळवारी याच परिसरात एक नर बिबट्या पकडण्यात आला होता. पारगाव तर्फे आळे येथील रामवाडीत सोमवारी (दि. १५) सकाळी बिबट्याच्या हल्ल्यात ८ वर्षीय रोहित कापरे या मुलाचा मृत्यू झाला होता. या घटनेनंतर नरभक्षक बिबट्याला पकडण्यासाठी वनविभागाने १५ पिंजरे आणि १० ट्रॅप कॅमेरे लावले होते. मंगळवारी सायंकाळी ५ वर्षे वयाचा नर बिबट्या जेरबंद झाल्यानंतर, आज पहाटे घटनास्थळापासून अवघ्या १५० मीटर अंतरावर ही मादी बिबट्या पिंजऱ्यात अडकली. पिंजऱ्यात जेरबंद झालेली मादी असल्याने, या परिसरात तिची पिल्ले असण्याची शक्यता नाकारता येत नाही. त्या दृष्टीने वनविभागाकडून परिसरात अधिक तपास करण्यात येत आहे. जुन्नरचे उपवनसंरक्षक प्रशांत खाडे, सहाय्यक वनसंरक्षक अधिकारी स्मिता राजहंस आणि ओतूरचे वनपरिक्षेत्र अधिकारी चैतन्य कांबळे यांच्या मार्गदर्शनाखाली वनविभागाची पथके सध्या या भागात तळ ठोकून आहेत.
