प्रभात वृत्तसेवा वाफगाव – पूर येथे सप्टेंबर 2025 मध्ये माजी आमदार दिलीप मोहिते पाटील यांच्या माध्यमातून मंजूर झालेल्या विविध विकासकामांचे उद्घाटन व भूमिपूजन त्यांच्या हस्ते करण्यात आले. यामध्ये दशक्रिया घाट सुधारणा काम, पिंपरे वस्तीतील सिमेंट काँक्रिटीकरण रस्त्याचे काम सुरू करण्यात आले असून, ग्रामपंचायत कार्यालय पूर समोरील सभामंडपाचे अनावरणही यावेळी करण्यात आले. या प्रसंगी सरपंच संदीप गावडे व नामदेव गावडे यांनी सांगितले की, सन 2021 ते 2025 या चार वर्षांच्या कालावधीत विद्यमान ग्रामपंचायत कमिटीने आमदार मोहिते पाटील यांच्या माध्यमातून सुमारे 41.5 कोटी रुपयांची विकासकामे पूर्ण केली आहेत. दरम्यान, अश्विनी पाचारणे यांनी यापुढील तीन ते चार वर्षे पूर्वी मंजूर झालेलीच कामे सुरू राहणार असल्याचे नमूद केले. उद्घाटन व अनावरण कार्यक्रमात बोलताना आमदार दिलीप मोहिते पाटील म्हणाले की, पुणे जिल्ह्यात राष्ट्रवादी काँग्रेसची ताकद भक्कम असून, आगामी काळात जिल्हा परिषदेत सत्ता राष्ट्रवादी काँग्रेसचीच येणार आहे. अधिक विकास हवा असेल तर राष्ट्रवादी काँग्रेस पक्षाला साथ द्यावी, अन्यथा पाच वर्षे वाया गेल्याशिवाय राहणार नाहीत, असा इशाराही त्यांनी दिला. यावेळी आनंदा गावडे व माजी सरपंच अभिषेक गावडे यांनी कर्जत-भीमाशंकर रस्ता, सौरऊर्जा प्रकल्प तसेच गायरान गटाच्या मोजणीबाबतच्या समस्या मांडल्या. आमदार मोहिते पाटील यांनी या सर्व प्रश्नांचे समाधानकारक निरसन केले.कार्यक्रमास संचालक अरुण चांभारे, माजी सरपंच बबन गावडे, लता गावडे, संगीता गावडे, कालिदास सावंत, उपसरपंच किशोर सावंत, माजी उपसरपंच किरण गावडे, तंटामुक्ती अध्यक्ष नवनाथ गावडे, सुदामराव गावडे, विकास गावडे, शालेय व्यवस्थापन समिती अध्यक्ष साईनाथ गावडे, गुलाबराव गावडे, लहू गावडे, पंडित गाडे, चेअरमन विठ्ठल गावडे, प्रदीप गावडे, मोहन राऊत, संचालक बापू गावडे, बायफ प्रतिनिधी सुमित गावडे, साहेबराव गावडे, बाळासाहेब गावडे तसेच मोठ्या संख्येने ग्रामस्थ व महिला उपस्थित होत्या.
