प्रभात वृत्तसेवा जुन्नर – शहराचा विकास हा आमचा एकमेव ध्यास असून शहराच्या प्रगतीसाठी सर्वपक्षीय नगरसेवकांना सोबत घेऊन आमदार शरद सोनवणे यांच्या मार्गदर्शनाखाली कामकाज करणार असल्याचे प्रतिपादन नवनिर्वाचित नगराध्यक्ष सुजाता काजळे यांनी केले. जुन्नर नगरपालिकेच्या छत्रपती संभाजी महाराज सभागृहात आयोजित पदग्रहण समारंभात त्या बोलत होत्या. पदभार स्वीकारण्यापूर्वी त्यांनी छत्रपती शिवाजी महाराजांच्या पुतळ्यास अभिषेक करून गोमाता पूजन केले. याप्रसंगी शिवसेना जिल्हा समन्वयक प्रसन्ना डोके, तालुकाप्रमुख योगेश पाटे, महिला आघाडी प्रमुख संगीता वाघ, ज्येष्ठ नगरसेवक अलकाताई फुलपगार, राजश्री खोंड, सुवर्णा जाधव, मुख्याधिकारी चरण कोल्हे, पोलीस निरीक्षक किरण अवचार आणि विविध मान्यवर उपस्थित होते. प्रसन्ना डोके यांनी उपमुख्यमंत्री एकनाथ शिंदे यांच्या माध्यमातून शहरासाठी मोठा निधी आणण्याचे आश्वासन दिले, तर आमदार शरद सोनवणे यांनी मुंबईतून भ्रमणध्वनीद्वारे शुभेच्छा देत सर्वांना समान न्याय देण्याचे आवाहन केले. विशेष म्हणजे, सुजाता काजळे यांनी पदभार स्वीकारताना नगरपालिकेच्या सेवानिवृत्त स्वच्छता कर्मचारी वत्सला दबडे यांना नगराध्यक्षाच्या खुर्चीत बसवून सन्मान दिला. त्यानंतर पहिल्या सभेचा अजेंडा काढून कामाला सुरुवात केली. दरम्यान, या सोहळ्याला राष्ट्रवादी काँग्रेस, भाजप आणि राष्ट्रीय काँग्रेसच्या नवनिर्वाचित नगरसेवकांनी गैरहजेरी लावल्याने उपस्थितांमध्ये उलटसुलट चर्चा सुरू होती. जनतेने विकासकामांसाठी निवडून दिले असताना अशा प्रकारे अनुपस्थित राहण्यावर अनेकांनी नाराजी व्यक्त केली.
