Fake Bhandara Sale – कुलदैवत खंडेरायाच्या जेजुरी नगरीत देवदर्शन कुलधर्म कुळाचारासाठी येणाऱ्या भाविक भक्तांना NON EDIBAL ,NON COSMITIC असे शिक्के असलेला भंडारा विक्री होत आहे. हा भंडारा खाण्यात व त्वचेवर सुद्धा संपर्कात येत असून हा भंडारा विक्रीस प्रतिबंध करावा यासाठी अन्न व औषध भेसळ प्रशासनासह ,तहसीलदार व पोलीस प्रशासनाला निवेदन दिले. कार्यवाही न झाल्यास येत्या १५ एप्रिल पासून खंडेरायाच्या पहिल्या पायरीवर बेमुदत उपोषणाला प्रारंभ करणार असल्याचे देवसंस्थानचे माजी प्रमुख विश्वस्त शिवराज झगडे यांनी निवेदनात म्हटले आहे. गेली अनेक वर्षे बनावट व भेसळीच्या भंडाऱ्याबाबत अन्न व औषध भेसळ प्रशासनाला निवेदने दिली आहेत. गतवर्षी अन्न व औषध भेसळ प्रशासन मंत्री नरहरी झिरवळ यांनाही निवेदने देत बनावट भंडारा विक्रीवर प्रतिबंध घालण्यात यावा, असे निवेदन दिले होते. मात्र, तरीही काही प्रमाणात बनावट भंडारा विक्रीसाठी दिसून येत आहे. चांगल्या प्रतीचा भंडारा १६००ते २२०० रुपये प्रती १० किलो येथे विकला जातो. बहुतांश भाविकांमध्ये खोबरे मिसळून देवाचे चरणी अर्पण करतात उधळण करतात. प्रसाद म्हणूनही भक्षण करतात. खाण्यासाठी, सौंदर्यप्रसाधनासाठी वापरात नसलेला फक्त पूजेसाठी योग्य, असे शिक्के असलेल्या भंडाऱ्याबाबत भाविक फसतात. हा भंडारा १००० ते १२०० रुपये प्रति १० किलो असा विकला जात आहे. काही पिशव्यांवर कंपनीचा शिक्का किंवा दर्जाचा उल्लेख नसतो, असा भंडारा सुद्धा येथे वितरित केला जात आहे. पुढील काळात जत्रा, यात्रा उत्सवांचे दिवस आहेत. जून महिन्यात सोमवती यात्रा आहे. त्यापूर्वीच बनावट भंडारा वितरित होण्यास प्रतिबंध करावा; अन्यथा (दि.१५) एप्रिलपासून उपोषण करणार असल्याचे झगडे यांनी निवेदनात म्हटले आहे.
