प्रभात वृत्तसेवा मंचर – मी मुख्यमंत्री असताना राज्यातील महिलांसाठी मुख्यमंत्री लाडकी बहीण योजना सुरू केली. या योजनेचा लाभ लाखो महिलांना झाला. ही योजना सुरू केल्यानंतर अनेकांनी खोडा घालण्याचा प्रयत्न केला. मात्र, कोणीही येऊ द्या ही योजना बंद होणार नाही, असे मत राज्याचे उपमुख्यमंत्री एकनाथ शिंदे यांनी शुक्रवार, दि. 28 रोजी व्यक्त केले.मंचर येथे नगरपंचायत निवडणुकीच्या पार्श्वभूमीवर आयोजित प्रचार सभेत ते बोलत होते. मंचर नगरपंचायत निवडणूक शिवसेना स्वतंत्र निवडणुकीच्या मैदानात उतरली असून नगराध्यक्ष पदाच्या उमेदवार व इतर नगरसेवकांच्या प्रचारार्थ उपमुख्यमंत्री एकनाथ शिंदे यांची सभा संपन्न झाली.उपमुख्यमंत्री एकनाथ शिंदे म्हणाले, येणाऱ्या दोन तारखेला मंचर नगरपंचायतीवर भगवा फडकवायचा आहे. सर्वांनी धनुष्यबाणाला विजयी करावे दिलेला शब्द पाळणार मंचर शहराचा सर्वांगीण विकास करणार. यापूर्वी मंचरसाठी १०५ कोटी रुपयांचा निधी दिला आहे. काहीजण म्हणतात निधीचा महापूर आणणार, मात्र माझ्याकडून पैसे आणले आणि स्वतःचे नाव सांगता हे काही बरोबर नाही. मी मुख्यमंत्री असताना विविध योजना राबवल्या आहेत शासन आपल्या दारी योजनेतून चार कोटी लोकांना लाभ मिळाला आहे मुख्यमंत्री सहायता निधीतून कोट्यावधी रुपये दिले आहे. परिसर भयमुक्त करणार तसेच या परिसरात बिबट्यांची संख्या मोठ्या प्रमाणात असून बिबट्याचा बंदोबस्त करण्यासाठी पिंजरे वाढवले आहेत. रेस्क्यू सेंटर वाढवले असून नरभक्षक बिबट्याला आताच गोळ्या घालण्याचे आदेश देखील दिलेले आहेत. बिबट्याचा बंदोबस्त आपल्याला करायचा असून येथील परिसर भयमुक्त करणार असल्याचे आश्वासन देखील उपमुख्यमंत्री एकनाथ शिंदे यांनी दिले.
