प्रभात वृत्तसेवा बारामती – राज्यात नगरपरिषद, नगरपंचायत निवडणुकीपासून दोन्ही राष्ट्रवादीचे सूर जुळले. त्यानंतर पुणे, पिंपरी महापालिका निवडणुकीत दोन्ही राष्ट्रवादीने एकत्र निवडणूक लढविली. त्यानंतर महापालिकांच्या धुरळा खाली बसतो न् बसतो तोच बारामती येथे राष्ट्रवादी (शरद पवार) पक्षाचे प्रदेशाध्यक्ष शशिकांत यांनी जिल्हा परिषद निवडणुकीत मतांचे विभाजन टाळण्यासाठी दोन्ही राष्ट्रवादी एकत्रित लढण्याची घोषणा केली. मात्र, अजित पवार यांनी कोणतीही बैठक झाली नसून माहिती घेऊन सांगतो, असे मोघम उत्तर दिले आहे. झेडपीच्या निवडणुकीत दोन्ही राष्ट्रवादी एकत्रित लढणार काय, यावर अद्याप संभ्रम आहे.जिल्हा परिषद आणि पंचायत समिती निवडणुकीसाठी उमेदवारी अर्ज दाखल करण्यासही सुरुवात झाली. या पार्श्वभूमीवर बारामतीत राजकीय घडामोडी घडत आहेत. महानगरपालिका निकालानंतर उपमुख्यमंत्री अजित पवार यांनी (दि.१७) सकाळी ज्येष्ठ नेते शरद पवार यांची गोविंदबाग या निवासस्थानी भेट घेतली. यावेळी जिल्हा परिषद निवडणुका एकत्र लढण्याबाबत चर्चा झाल्याचे संकेत मिळत आहेत.कृषिक प्रदर्शनाच्या उद्घाटनानिमित्त शरद पवार हे बारामतीत आहेत. सकाळी उपमुख्यमंत्री पवार यांनीही त्यांची भेट घेत प्रदीर्घ चर्चा केली. भेटीदरम्यान, राष्ट्रवादीचे प्रदेशाध्यक्ष शशिकांत शिंदे, माजी मंत्री जयंत पाटील, खासदार सुप्रिया सुळे, खासदार अमोल कोल्हे, आमदार रोहित पवार उपस्थित होते. जिल्हा परिषद निवडणुका दोन्ही राष्ट्रवादीकडून एकत्र लढवण्याची चर्चा या बैठकीत झाल्याची माहिती पुढे येत आहे.दरम्यान, महानगरपालिका निवडणुकीत झालेल्या पराभवानंतर शरद पवार, उपमुख्यमंत्री पवार हे लगेच कामाला लागले आहेत. त्याच अनुषंगाने राजकीय घडामोडींना वेग आला आहे. या पार्श्वभूमीवर अजित पवार यांनी गोविंदबाग येथे जाऊन शरद पवार यांच्याशी चर्चा केली आहे. या भेटीतून राजकीय निष्कर्ष काढले जात आहेत. मतांचे विभाजन टाळण्यासाठी एकत्र दरम्यान, राष्ट्रवादी शरद पवार पक्षाचे प्रदेशाध्यक्ष शशिकांत शिंदे यांनीही बैठकीबाबत माहिती देताना म्हणाले, दोन्ही राष्ट्रवादी जिल्हा परिषद, पंचायत समिती निवडणुकीत एकत्र येण्याबाबत चर्चा झाली आहे. त्यानुसार स्थानिक परिस्थिती लक्षात घेऊन निर्णय घेतला जाणार आहे. शहरी आणि ग्रामीण भागातील मतदार यामध्ये फरक असून मतांचे विभाजन टाळण्यासाठी आम्ही एकत्र येण्याबाबत निर्णय घेणार असल्याचेही त्यांनी नमूद केले. मी माहिती घेऊन बोलतो- अजित पवार जिल्हा परिषद पंचायत समिती निवडणुकीच्या पार्श्वभूमीवर दोन्ही राष्ट्रवादी एकत्र येणार असल्याचे चर्चेबाबत उपमुख्यमंत्री अजित पवार यांना विचारले असता ते म्हणाले की, याबाबत कुठलीही बैठक झाली नाही. कृषी प्रदर्शनासाठी आम्ही शरद पवार यांच्याकडे गोविंदबाग येथे गेलो होतो. तेथून आम्ही एकत्रितपणे कृषी प्रदर्शनाकडे गेलो. जिल्हा परिषद, पंचायत समिती निवडणुका स्थानिक कार्यकर्त्यांसाठी असतात. त्यामुळे हे अधिकार जिल्ह्यात स्थानिक पातळीवर घेतले जातील. आम्ही महायुती म्हणून काम करीत आहे. शिंदे यांनी याबाबत माहिती दिल्याचे सांगितले असता ते म्हणाले, याबद्दल मी माहिती घेऊन बोलतो.
