प्रभात वृत्तसेवा बारामती – बारामती नगरपरिषद निवडणुकीमध्ये भाजप व शिंदे शिवसेनेला पराभवाचा सामना करावा लागला. राष्ट्रवादी अजित पवार गटाच्या विरोधात लढणाऱ्या बसप, रासप तसेच राष्ट्रवादी शरद पवार गटाने प्रत्येकी एक जागेवर विजय मिळवत आपले अस्तित्व टिकवले. भाजप व शिवसेनेचा मात्र दारूण पराभव झाला आहे. भाजप, शिवसेनेच्या हायकमांडकडून बारामतीत बळ कमी पडल्याचे निकालातून स्पष्ट झाले आहे. बारामती नगर परिषदेच्या निवडणुकीत राष्ट्रवादी विरुद्ध महायुतीतच असलेल्या भाजप व शिवसेना शिंदे गटाने निवडणूक लढवली. मात्र, त्यांच्या पदरी निराशा आली. बसप, रासप, तसेच राष्ट्रवादी (शरद पवार) यांच्या उमेदवारांनी पक्षाच्या तसेच स्वतःच्या ताकदीवर जोरदार प्रचार मोहिम राबवली होती. भाजप व शिवसेना गटाला मात्र ते जमले नाही. भाजप कार्यकर्त्यांनी मात्र एकमेकांच्या विरोधात कुरघोड्या करण्यातच धन्यता मानली. (दि.२) डिसेंबर रोजी होणाऱ्या निवडणुकीत भाजपने जोर दाखवला होता. निवडणूक लांबणीवर गेल्यानंतर मात्र भाजपचा जोर ओसरला. भाजपाच्या वरिष्ठ नेत्यांनी देखील बारामतीची निवडणूक फारसी गांभीर्याने घेतली नाही. त्यामुळे क्षमता असताना देखील भाजपचा एकही उमेदवार बारामतीच्या रिंगणात टिकला नाही. निवडणुकीच्या काळात लागणारी आर्थिक रसद पुरवण्यातही भाजप कमी पडले. त्यामुळे निवडणुकीच्या शेवटच्या दिवसापर्यंत उमेदवार व कार्यकर्ते आर्थिक विवंचनेत व सैरभैर राहिले. नगराध्यक्ष पदाचे उमेदवार गोविंद देवकाते यांनी त्यांच्या परीने प्रयत्न केले. मात्र, त्यांना मोठ्या पराभवाला सामोरे जावे लागले. शिवसेनेचे पुणे जिल्हा प्रमुख सुरेंद्र जेवरे यांनी धनुष्यबाणाचे चिन्हावर काही उमेदवार रिंगणात उतरवले होते. ते स्वतः नगराध्यक्ष पदासाठी उमेदवार म्हणून रिंगणात होते. मात्र, तोकडी यंत्रणा असल्याने ते मतदारांपर्यंत पोहोचू शकले नाहीत. त्यामुळे निवडणुकीत भाजप व शिवसेना प्रभाव पाडू शकली नाही.
