YCM Hospital – महापालिकेच्या यशवंतराव चव्हाण स्मृती (वायसीएम) रुग्णालयाच्या सुरक्षेत गंभीर चुका आहेत. प्रवेशद्वाराजवळ कोणतीही सक्षम सुरक्षा यंत्रणा नाही. त्यामुळे समजाकंठकांकडून रुग्णालयामध्ये अनुचित प्रकार घडण्याची शक्यता असल्याची भीती महापालिकेचे विरोधी पक्षनेते भाऊसाहेब भोईर यांनी व्यक्त केली आहे. भाऊसाहेब भोईर यांनी बुधवारी (दि. १८) वायसीएम रुग्णालयाची पाहणी केली. यावेळी त्यांना रुग्णालयाच्या प्रवेशाद्वाराजवळ सक्षम अशी कोणतीही सुरक्षा यंत्रणा दिसून आली नाही. यामुळे शहरातील काही समाजकंठकाच्या माध्यमातून रुग्णालयामध्ये हिंसकवृत्तीने अनुचित प्रकार होऊन सर्वसामान्य नागरिकांच्या जिवीताला धोका निर्माण होऊ शकतो अशी भीती त्यांनी व्यक्त केली आहे. रुग्णालयाच्या प्रवेशद्वाराजवळ येणाऱ्या नागरिकांची मेटल डिटेक्टर मशिनद्वारे तसेच त्यांच्या बॅगांची तपासणी केली जात नाही असे पाहणीत निदर्शनास आले आहे. सुरक्षेच्या दृष्टीने कोणतीही सक्षम सुरक्षा यंत्रणा नसल्याने बॉम्ब अथवा घातक शस्त्र यांचा वापर करुन रुग्ण व डॉक्टर यांच्या जिवावर प्राणघातक हल्ला होऊन मोठी जिवीत हानी होऊ शकते. त्यामुळे वायसीएम येथील प्रवेशद्वारावर मेटल डिटेक्टर मशिन व बॅग चेकींग मशीन बसवावेत अशी मागणी भोईर यांनी केली आहे.
