प्रभात वृत्तसेवा पिंपरी – पिंपरी चिंचवड महापालिकेमध्ये भारतीय जनता पार्टीने ८४ जागा जिंकत बहुमत मिळवत एकहाती सत्ता मिळवली आहे. आता महापौर कोण होणार याकडे सर्वांचे लक्ष लागले आहे. अनुसूचित जाती, अनुसुचित जमाती, ओबीसी की सर्वसाधारण गटाचा महापौर होणार हे आज (दि. २२) आरक्षण सोडतीमध्ये स्पष्ट होणार आहे. महापौरपदाच्या आरक्षणासाठी मुंबईमध्ये सोडत पार पडणार आहे. शहरामध्ये भाजपामध्ये भोसरी आणि चिंचवड असे दोन गट आहे. तर पिंपरी विधानसभेमध्ये देखील पडद्याआडून सूत्रे हलवली जातात. नक्की कोणाला महापौर, स्थायी समिती यासारखी महत्वाची पदे मिळणार याकडे संपूर्ण शहराचे लक्ष लागले आहे. पिंपरी चिंचवड महापालिकेच्या स्थापनेपासून भाजप कायमच विरोधी बाकावर बसत होता. मात्र, सन २०१७ मध्ये भाजपाने दमदार कामगिरी करत ७७ जागा मिळवल्या होत्या. त्यावेळी महापालिकेतील बहुसंख्य नगरसेवक नवखे होते. असे असतानाही नवख्या नगरसेवकांना देखील महापौर पद, स्थायी समितीचे सभापतीपद अशा महत्वाच्या पदांवर काम करण्याची संधी पक्षाने दिली. सन २०१७ ते २०२२ या काळात नितीन काळजे, राहुल जाधव, माई ढोरे यांनी महापौरपद सांभाळले.तर सीमा सावळे, ममता गायकवाड, विलास मडेगिरी, संतोष लोंढे, ज्ञानेश्वर लांडगे यांनी स्थायी समितीचे सभापतीपद सांभाळले. आता पुन्हा एकहाती सत्ता आल्यामुळे महापौर पदाची संधी कोणाला मिळणार याकडे लक्ष लागले आहे. तर सत्तास्थापनेचे आकडे समोर आल्यानंतर तातडीने नवनिर्वाचित नगरसेवकांनी वशिला लावण्यास सुरूवात केली आहे. कोणाला महापौरपदी संधी द्यायचे हे आरक्षण सोडतीनंतर नेत्यांना ठरवता येणार आहे. त्यासाठी आज सोडत होणार असून दुपारी याबाबतचे चित्र स्पष्ट होईल. कसे पडणार आरक्षण? चार वर्ष प्रशासक राजवट असल्याने पुन्हा पहिल्यापासून नव्याने आरक्षण काढण्याबाबत विचार सुरू आहे. यापूर्वी सर्वसाधारण महिला, अनुसूचित जमाती (एसटी) महिला, ओबीसी खुला व त्यानंतर सर्वसाधारण महिला असे आरक्षण पडले आहे. हे आरक्षण गृहीत धरून सोडत काढली तर अनुसुचित जाती (एससी) चे आरक्षण पडण्याची सर्वाधिक शक्यता आहे. मात्र, यापूर्वीचे आरक्षण गृहीत न धरता चार वर्ष प्रशासक राजवट असल्याने पुन्हा नव्याने आरक्षण काढले तर कोणतेही आरक्षण पडू शकते.
