Underground Road – पुणे आणि पिंपरी-चिंचवड शहरातील वाढती वाहतूक कोंडी फोडण्यासाठी पुणे महानगर प्रदेश विकास प्राधिकरणने ५४ किलोमीटर लांबीच्या भुयारी रस्त्यांचे जाळे उभारण्याचा महत्त्वाकांक्षी प्रस्ताव तयार केला आहे. सुमारे ३२ हजार कोटी रुपये खर्चाच्या या प्रकल्पामुळे शहरातील मुख्य वाहतूक मार्गांना मोठा दिलासा मिळणार आहे. मात्र, हा प्रकल्प साकारण्यासाठी पुणे युनिफाइड मेट्रोपॉलिटन ट्रान्सपोर्ट ऑथॉरिटीच्या मंजुरीची प्रतीक्षा आहे.शहराचा झपाट्याने होत असलेला विस्तार, वाहनसंख्येतील वाढ आणि रस्ते रुंदीकरणाच्या मर्यादा लक्षात घेता, भुयारी बोगद्यांचा पर्याय पुढे आणण्यात आला आहे. पीएमआरडीएने तयार केलेला पूर्व-व्यवहार्यता अहवाल अंतिम टप्प्यात असून, लवकरच तो पुम्टासमोर सादर केला जाणार आहे.त्यानंतर राज्य मंत्रिमंडळाकडे प्रस्ताव पाठवून निधी उभारणी, टप्प्याटप्प्याने बांधकाम आणि आंतरराष्ट्रीय बँकांकडून कर्ज उभारणीचे धोरण निश्चित केले जाणार आहे. मुख्यमंत्री कार्यालयाकडून प्राथमिक पाहणी झाल्यानंतर या प्रकल्पाला प्रशासकीय गती मिळाली असून, महानगर आयुक्त डॉ. योगेश म्हसे स्वतः या प्रकल्पाचा आढावा घेत आहेत. हा प्रकल्प प्रत्यक्षात उतरल्यास प्रवासाचा वेळ, इंधनाचा अपव्यय आणि प्रदूषण मोठ्या प्रमाणात कमी होण्याची अपेक्षा व्यक्त केली जात आहे. प्रस्तावित भुयारी मार्गाची वैशिष्ट्ये : – उत्तर–दक्षिण दिशेने येरवड्यापासून कात्रजपर्यंत थेट भुयारी कॉरिडॉर – जगताप डेअरी, सिंहगड रोड, पाषाण, कोथरूड, औंध, संगमवाडी, खडकी या वर्दळीच्या भागांतून मार्ग – अंतर्गत रिंगरोड व बाह्य महामार्गांशी थेट जोडणी
