प्रभात वृत्तसेवा तळेगाव दाभाडे – तळेगाव दाभाडे नगरपरिषदेच्या विरोधी पक्षनेतेपदी राष्ट्रवादी काँग्रेसचे ज्येष्ठ नगरसेवक संतोष छबुराव भेगडे यांची नियुक्ती करण्यात आली. ही नियुक्ती पिठासन अधिकारी तथा नगराध्यक्ष संतोष दाभाडे पाटील यांनी जाहीर केली आहे.नगरपरिषदेची पहिली सर्वसाधारण सभा मंगळवारी (दि. १३) पार पडली. या सभेत नगरपरिषदेतील विविध पदाधिकाऱ्यांच्या नियुक्त्याही जाहीर करण्यात आल्या. यामध्ये राष्ट्रवादी काँग्रेस पक्षप्रतोदपदी सत्यम खांडगे, राष्ट्रवादी गटनेतेपदी हेमलता खळदे यांची, तर भारतीय जनता पक्षाच्या गटनेतेपदी इंद्रकुमार ओसवाल यांची निवड करण्यात आली.नवनियुक्त विरोधी पक्षनेते संतोष भेगडे हे सहकार क्षेत्रातील जाणकार असून ते पुणे जिल्हा नागरी सहकारी पतसंस्थेचे सचिव म्हणून कार्यरत आहेत. तसेच ते पुणे महानगर समितीचे विद्यमान सदस्य असून यापूर्वी नगरसेवक म्हणून विविध समित्यांवर त्यांनी यशस्वी काम केले आहे. राष्ट्रवादी काँग्रेस पक्षाच्या संघटनात्मक पातळीवरही त्यांनी राज्यस्तरावर जबाबदारी सांभाळली आहे.भाजप गटनेते इंद्रकुमार ओसवाल हे भाजपचे पुणे जिल्हा खजिनदार असून माजी नगरसेवक आहेत. तर राष्ट्रवादी गटनेत्या हेमलता खळदे यांनी यापूर्वी नगरसेवक म्हणून काम करताना महिला व बालकल्याण समिती सभापती तसेच विरोधी पक्षनेते पद भूषविले आहे. पक्षप्रतोद सत्यम खांडगे हे खांडगे उद्योग समूहाचे संचालक असून उद्योजक आहेत.या सर्व नियुक्तींचे सर्वत्र स्वागत होत असून आयोजित कार्यक्रमात मावळ तालुक्याचे आमदार सुनील शेळके, नगराध्यक्ष संतोष दाभाडे व उपनगराध्यक्ष गणेश काकडे यांच्या हस्ते नवनियुक्त पदाधिकाऱ्यांचा सन्मान करण्यात आला. यावेळी सर्वांना पुढील कार्यासाठी शुभेच्छा देण्यात आल्या.
