प्रभात वृत्तसेवा शिक्रापूर – पेरणे फाटा येथे १ जानेवारी रोजी होणाऱ्या शौर्यदिन मानवंदना कार्यक्रमाच्या पार्श्वभूमीवर प्रशासनाने विशेष खबरदारी घेतली असून सुरक्षेसाठी अत्याधुनिक वरुण वज्र वाहन परिसरात दाखल झाले आहे. सन २०१८ च्या घटनेनंतर दरवर्षी पोलीस प्रशासनाकडून चोख नियोजन केले जात असून, यंदाही शांतता व सुव्यवस्था राखण्यासाठी पुणे ग्रामीण आणि शहर पोलिसांच्या वतीने मोठा फौजफाटा तैनात करण्यात आला आहे. या सुरक्षा व्यवस्थेमध्ये पुणे ग्रामीण हद्दीत पाच हजार आणि पुणे शहर पोलीस हद्दीत पाच हजारपेक्षा जास्त पोलीस अधिकारी व कर्मचारी नियुक्त करण्यात आले आहेत. त्यांच्या मदतीला राज्य राखीव पोलीस दलाच्या तुकड्या, अग्निशमन बंब आणि वरुण वज्र वाहने सज्ज आहेत. बॉम्ब शोधक पथकाकडूनही संपूर्ण परिसरात तपासणीचे प्रात्यक्षिक घेण्यात आले आहे. कोरेगाव भीमात दाखल झालेल्या वरुण वज्र वाहनाची क्षमता शंभर ते सव्वाशे फूट उंचीवर आणि लांब अंतरावर वेगाने पाण्याचे फवारे मारण्याची आहे.गरज पडल्यास जमाव पांगवण्यासाठी किंवा आपत्कालीन परिस्थितीत आग विझवण्यासाठी या वाहनाचा प्रभावी वापर केला जातो. विशेष म्हणजे या वाहनातील पाण्याच्या टाकीत विविध रंग मिसळून फवारे मारण्याची सुविधा असल्याने गर्दीवर नियंत्रण मिळवणे सुलभ होते. प्रशासनाने या अत्याधुनिक सामुग्रीसह कोरेगाव भीमा, सणसवाडी आणि पेरणे परिसरात सुरक्षा कवच निर्माण केले आहे. शौर्यदिनाचा सोहळा निर्विघ्नपणे पार पाडण्यासाठी पोलीस दल पूर्णतः तयारीत असून नागरिकांनी सहकार्य करण्याचे आवाहन करण्यात आले आहे.
