पिंपरी : महापालिकेची निवडणूक जसजशी जवळ येत आहे, तशा मोठ्या घडामोडी घडत आहेत. शिवसेना उद्धव बाळासाहेब ठाकरे पक्षाचे शहरप्रमुख व माजी महापौर संजोग वाघेरे यांनी भाजपामध्ये प्रवेश केल्यानंतर अंतर्गत वाद चव्हाट्यावर आला आहे. त्यांच्या प्रवेशाने प्रभाग क्रमांक २१ मधील भाजपचे माजी नगरसेवक पक्ष सोडण्याच्या तयारीत आहेत. यासाठी त्यांनी नुकतीच बैठक घेत स्थानिकांशी संवाद साधला आहे. भाजपाचे माजी नगरसेवक संदीप वाघेरे हे २०१७ ला प्रभाग क्रमांक २१ मधून नगरसेवक झाले. त्यांच्या राजकारणाची सुरुवातच संजोग वाघेरे यांना विरोध या सूत्राने झाली असल्याचे बोलले जाते. संजोग वाघेरे यांनी लोकसभेला शिवसेनेत प्रवेश करत मावळ लोकसभा लढवली. त्यांना विरोध म्हणून संदीप वाघेरे यांनी श्रीरंग बारणे यांचे जोमाने काम करत पिंपरीमधून त्यांना लीड दिले. आता तेच संजोग वाघेरे भाजपमध्ये दाखल झाल्याने संदीप वाघेरेंची नाराजी ओढावली आहे. प्रवेशाची शंका आल्यानंतर त्यांनी पक्षश्रेष्ठींशी बोलून त्यांना प्रवेश दिला तर मी वेगळी भूमिका घेईल असे स्पष्ट केले होते. मात्र, तरीही संजोग वाघेरे यांना भाजपमध्ये प्रवेश देण्यात आला. त्यानंतर आता संदीप वाघेरे यांनी सवता सुभा मांडण्याची हालचाल सुरू केली आहे. त्यासाठी पिंपरी गावातील स्थानिकांची त्यांनी बैठक घेतली. या बैठकीमध्ये त्यांनी संजोग वाघेरे यांना दिलेल्या प्रवेशाचा निषेध केला. तर आपल्यावर झालेल्या अन्यायाचा पाढा देखील वाचला. संदीप वाघेरे म्हणाले. मी प्रवेश देऊ नका असे सांगितले होते. मी यांच्यासोबत उभा राहिलो तरी दगाफटका होण्याची शक्यता आहे. मी अनेकांशी बोललो आहे , त्यामधून काहीजण इथेच थांबयच म्हणत आहेत. तर काही अपक्ष उभे राहू, तिकडे जाऊ असे सांगत आहे. भाजपमधून नगरसेवक झाल्यानंतर दोनवेळा स्थायी समितीच्या सदस्यपदासाठी माझे नाव होते. पाच वर्षात मला एकही पद दिले नाही. डेअरी फार्म परिसरात मी ३५ हजार झाडे लावली. मला साधे वृक्ष प्राधिकरण सदस्यपद देखील पक्षाने दिले नाही. आता मी जे काही ठरवणार आहे, त्यासोबत तुम्ही शंभर टक्के उभे रहा असे आवाहन देखील संदीप वाघेरे यांनी यावेळी केले.
