Pune Metro – पुण्याच्या सार्वजनिक वाहतूक व्यवस्थेत नवे पर्व सुरू होत असून, हिंजवडी ते शिवाजीनगर या ‘मेट्रो लाईन ३’वर आता महिलांचे वर्चस्व असणार आहे. २३ किलोमीटर लांबीच्या या मार्गावर धावणाऱ्या मेट्रोचे संचालन थेट १०० महिला ट्रेन पायलट करणार असून, हा निर्णय सामाजिक परिवर्तनाच्या दृष्टीने ऐतिहासिक मानला जात आहे. ‘पिंक लाईन’ म्हणून ओळख मिळालेल्या या मेट्रो प्रकल्पामुळे पुण्याच्या वाहतुकीला वेग मिळणारच, शिवाय महिला सक्षमीकरणाचा ठोस संदेशही दिला जाणार आहे.हा महत्त्वाकांक्षी प्रकल्प पुणे महानगर प्रदेश विकास प्राधिकरणच्या मार्गदर्शनाखाली सार्वजनिक-खाजगी भागीदारीत साकारत आहे. प्रकल्पाच्या संचालन व देखभालीची जबाबदारी जागतिक कीर्तीच्या Keolis कंपनीकडे सोपवण्यात आली आहे. या उपक्रमात टाटा आणि सीमेन्स यांसारख्या दिग्गज कंपन्यांचा सहभाग आहे. मात्र, संपूर्ण मेट्रो संचालन महिलांच्या हाती देण्याचा निर्णय जागतिक रेल्वे क्षेत्रात ‘अद्वितीय प्रयोग’ म्हणून पाहिला जात आहे.निवड झालेल्या महिला ट्रेन पायलट्ससाठी विशेष प्रशिक्षणासोबतच त्यांच्या सुरक्षिततेसाठी स्वतंत्र प्रोटोकॉल आखण्यात आले आहेत. कामाच्या ठिकाणी, प्रवासादरम्यान तसेच शिफ्ट व्यवस्थापनात सुरक्षिततेची संपूर्ण जबाबदारी केओलिसकडून घेतली जाणार आहे. “हा प्रकल्प केवळ वाहतुकीपुरता मर्यादित नसून तो महिला सक्षमीकरणाचे जागतिक उदाहरण ठरेल,” असा विश्वास पीएमआरडीएच्या वरिष्ठ अधिकाऱ्यांनी व्यक्त केला आहे. वाहतूक कोंडीतून होणार सुटका दररोजच्या वाहतूक कोंडीमुळे हिंजवडी आयटी हबमधून शिवाजीनगरला पोहोचण्यासाठी सध्या दीड ते दोन तास लागत असतात. मेट्रो सुरू झाल्यानंतर हा प्रवास अवघ्या ४० मिनिटांत पूर्ण होणार आहे. त्यामुळे लाखो आयटी कर्मचारी वाहतूक कोंडीतून मुक्त होतील. आधुनिक तंत्रज्ञान, वेगवान सेवा आणि सामाजिक समावेशकतेचा संगम साधत ‘पिंक लाईन’ पुण्याच्या सार्वजनिक वाहतुकीला जागतिक दर्जावर नेणारी ठरणार आहे. मेट्रो लाईन ३ : थोडक्यात -मार्ग: हिंजवडी (मेगापोलिस सर्कल) – शिवाजीनगर (दिवाणी न्यायालय) -लांबी: २३ किमी (पूर्णतः उन्नत मार्ग) -स्थानके: २३ अत्याधुनिक -मेट्रो गाड्या: २२ Alstom मेट्रो ट्रेन -आयटीयन्सना दिलासा; प्रवासात वेळेची मोठी बचत
