पिंपरी – चिंचवड प्रभाग १८ मधील नागरिकांना गर्दी टाळून सुलभ व सुरक्षित प्रवास करता यावा, यासाठी आपल्या कार्यकाळात रस्ते विकासाला प्राधान्य दिल्याची माहिती माजी नगरसेवक सुरेश भोईर यांनी दिली. संत मदर तेरेसा उड्डाणपूलावर जाण्यासाठी स्वतंत्र रॅम्पची उभारणी करण्यात आली, तर थेरगावकडे जाण्यासाठी बटरफ्लाय ब्रिज बांधण्यात आला. लिंक रोड परिसरातील नागरिकांना काळेवाडी किंवा मुंबई–पुणे महामार्गावर जाण्यासाठी पिंपरीतून वळसा मारावा लागत होता. हा त्रास टाळण्यासाठी उभारलेल्या रॅम्पमुळे आता गर्दी टाळून थेट मार्ग उपलब्ध झाला आहे. तसेच थेरगावकडे जाणाऱ्या अरुंद धनेश्वर पुलावर होणारी वाहतूक कोंडी कमी करण्यासाठी बटरफ्लाय ब्रिज उपयोगी ठरत आहे. याशिवाय चिंचवडमधील अंतर्गत रस्त्यांचे कॉंक्रिटीकरण करण्यात आले. लिंक रस्ता ‘अर्बन स्ट्रीट’ पद्धतीने विकसित केल्यामुळे पादचाऱ्यांना सुरक्षित पदपथ उपलब्ध झाला आहे. दरम्यान, प्रभाग १८ मधून भाजपाच्या अपर्णा डोके (अ गट), मनीषा चिंचवडे भगत (ब गट), ॲड. मोरेश्वर शेडगे (क गट) आणि सुरेश भोईर (ड गट) निवडणूक रिंगणात आहेत. या विकासाचा त्यांना निवडणूक मोठा फायदा होणार आहे.
