पिंपरी – महापालिका निवडणुकीच्या प्रचारासाठी अवघा एक दिवस बाकी राहिला आहे. असे असतानाही अनेक प्रभागात पक्षांचे निष्ठावंत प्रचारात उतरले नसल्याचे चित्र आहे. यात काही मोजके राष्ट्रवादी शरदचंद्र पवार पक्ष, राष्ट्रवादी काॅंग्रेस आणि खूप मोठ्या संख्येने भाजपचे निष्ठावंतांची संख्या आहे. आपपल्या प्रभागात चांगला जनसंपर्क असलेले आणि प्रत्येक निवडणुकीत स्वत:ला झोकून देऊन पक्षाला मते मिळवून देणारे हे पदाधिकारी प्रचारापासून दूर आहेत. तर काही ठिकाणी तर कार्यकर्ते देखील घराबाहेर पडण्यास तयार नाहीत. मतदान अवघ्या तीन दिवसांवर येऊन ठेपले असतानाही कार्यकत्र्यांची मनधरणी करण्यात वरिष्ठांना अपयश आल्याचे दिसून येत आहे. अनेक प्रभागांमध्ये पदयात्रांना बोटावर मोजण्याइतके कार्यकर्ते दिसत आहेत. भाजपसाठी सर्वांत चिंतेची बाब म्हणजे भाजपच्या बूथ व्यवस्थापन यंत्रणेतील कार्यकर्ते नाराज असणे ही ठरत आहे. पक्षाच्या वतीने त्यांना विचारधारेसाठी आणि पक्षचिन्हासाठी काम करण्याचे आर्जव केले जात आहे. प्रभागांमध्ये क्रॉस वोटिंग होण्यासाठी मोर्चेबांधणी करण्यात येत असल्याचे राजकीय वर्तुळात चर्चिले जात आहे. पिंपरी-चिंचवड महापालिकेची निवडणूक २०१७ मध्ये झाली होती. या पालिकेच्या सभागृहाची मुदत मार्च २०२२ मध्ये संपली. त्यानंतर महापालिकेवर चार वर्षे प्रशासकराज होते. आता पालिकेच्या ३२ प्रभागांतील १२८ जागांसाठी ही निवडणूक होत आहे. यासाठी सहाशेहून अधिक उमेदवार निवडणूक रिंगणात उतरून नशीब अजमावत आहेत. सर्वच पक्षात शेकडो कार्यकर्ते, पदाधिकारी हे नगरसेवक पदासाठी इच्छुक होते, तर अनेक माजी नगरसेवकांनी प्रभागातील इतर सक्षम कार्यकर्त्यांना सोबत घेऊन निवडणुकीची तयारी केली होती. पण, भाजपने विरोधी पक्षातील २२ माजी नगरसेवकांना पक्षात प्रवेश देवून उमेदवारी दिली. मात्र, पक्षातील अनेक वर्ष प्रमाणिकपणे काम करणाऱ्या कार्यकर्ते व पदाधिकाऱ्यांना डावलले. त्यामुळे भाजपमध्ये नाराजांची संख्या मोठ्या प्रमाणात आहे. तसेच राष्ट्रवादी कॉग्रेस, शिवसेना, काँग्रेस या प्रमुख पक्षांना या प्रवृत्तीचा फटका बसत असल्याचे चित्र आहे. पक्षांतर करून आलेल्या उमेदवाराकडे इलेक्टिव्ह मेरिट आहे, असा युक्तिवाद केला जातो. परंतु स्थानिक पातळीवर तो कितपत स्वीकारला जातो, याचा गांभीर्याने विचार केला जात नाही. परिणामी, प्रचाराच्या काळात कार्यकर्त्यांचा उत्साह कमी झाला आहे. बूथ व्यवस्थापन कमकुवत होऊन पक्षाची संघटनात्मक ताकद कमी होत असल्याचे चित्र दिसून येत आहे. तर, दुसरीकडे मतदारांमध्ये देखील संभ्रम निर्माण झाला आहे. मतदार जागरूक झाला असून आता याबाबत प्रश्न उपस्थित करत आहेत. याचा परिणाम क्रॉस व्होटिंग, नोटा किंवा मतदानातील उदासीनता अशा स्वरूपात दिसण्याची शक्यता बळावली आहे. महापालिकेच्या २०१७ च्या निवडणुकीत चार सदस्यीय पध्दतीमध्ये १५ ठिकाणी क्रॉस व्होटिंग झाले होते. त्यामुळे भाजप, राष्ट्रवादी, शिवसेना, मनसे, अपक्ष असे उमेदवार निवडून आले होते. या सर्व बाबींचा विचार करून निवडणुकीत काही जाणकारांनी क्रॉस व्होटिंगच्या दृष्टीने मोर्चेबांधणी सुरू केली आहे. या क्रॉस व्होटिंगचा सर्वाधिक फटका भाजपला बसण्याची शक्यता व्यक्त केली जात आहे. आम्हाला चालवा असे निरोप सर्वच पक्षांमध्ये नाराज कार्यकर्त्यांची फळी आहे. अशा नाराज कार्यकर्त्यांना हेरण्याचे काम विरोधी पक्षातील जाणकार करत आहेत. विशेषकरून निवडून येण्याची क्षमता असणाऱ्या समोरच्या प्रभागातील माजी नगरसेवकांना साकडे घातले जात आहे. ज्या प्रभागात आपल्याला जास्त मते मिळतील, तिथे तुम्हाला चालवतो. तुमच्या प्रभागात अंतर्गत यंत्रणेद्वारे आम्हाला चालवा, असे निरोप देण्याचे काम सुरू आहे. अपक्षांना मिळणारा प्रतिसाद पक्षाचे एकनिष्ठ आता अपक्ष म्हणून रिंगणात उतरले आहेत. त्यांच्या सोशल मीडियावरील पोस्ट्ला मिळत असलेले लाइक्स आणि कमेंट्स देखील पक्षाच्या अधिकृत उमेदवारांची धाकधूक वाढवत आहेत. पूर्वी ज्यांच्या पोस्ट्सवर ४० ते ५० लाइक्स असायचे तिथे आता ही संख्या शेकडोंमध्ये गेली आहे. कमेंट्समध्ये अनेक ओळखीची नावे आणि उघडपणे मिळत असलेला असलेला पाठिंबा पाहून स्थानिक पातळीवरील नेत्यांची चिंता वाढली आहे. या प्रभागांमध्ये होणार क्रॉस वोटिंग? प्रभाग १ चिखली-मोरेवस्ती, प्रभाग २ जाधववाडी-मोशी, प्रभाग ३ चऱ्होली, प्रभाग ४ दिघी-बोपखेल, प्रभाग ५ गवळीनगर-चक्रपाणी वसाहत, प्रभाग ७ भोसरी गावठाण, प्रभाग ८ इंद्रायणी नगर-बालाजीनगर, प्रभाग ११ कृष्णानगर, पुर्णानगर, प्रभाग १३ निगडी-सेक्टर २२, प्रभाग १४ चिंचवड स्टेशन-मोहनगर. प्रभाग १५ आकुर्डी गावठाण-निगडी, प्रभाग १६ बिजलीनगर-प्रेमलोक पार्क, प्रभाग १८ चिंचवड गावठाण, प्रभाग १९ उद्योगनगर, विजयनगर-भाटनगर, प्रभाग २० संत तुकाराम नगर, प्रभाग २१ पिंपरीगाव, प्रभाग २३ थेरगाव गावठाण. प्रभाग २४ थेरगाव दत्तनगर, प्रभाग २५ वाकड-पुनावळे, ताथवडे, प्रभाग २६ कस्पटेवस्ती पिंपळे निलख, प्रभाग २८ पिंपळे सौदागर, प्रभाग २९ पिंपळे गुरव, प्रभाग ३१ सांगवी, प्रभाग ३२ सांगवी गावठाण याठिकाणी अंतर्गत हालचाली वाढल्या असून क्रॉस वोटिंग होण्याची शक्यता आहे.
