PCMC News – पिंपरी चिंचवड महापालिकेच्या विविध विषय समित्यांच्या सभापती पदांसाठी इच्छुक सदस्यांनी बुधवारी (दि. २५) नगरसचिव कार्यालयात अर्ज दाखल केले. त्यामध्ये महापालिका तिजोरीच्या चाव्या असलेल्या स्थायी समिती सभापतीपदी भाजपने अभिषेक बारणे यांना संधी दिली आहे. त्यांच्यासह विविध विषय समितीच्या सभापती पदासाठी देखील प्रत्येकी एक-एक अर्ज आला आहे. तसेच राष्ट्रवादी काँग्रेसने या निवडणुकीत भाग न घेतल्याने ही निवडणूक बिनविरोध होणार आहे. स्थायी समितीच्या सभापतींची निवडणूक शनिवारी (दि. २५) महापालिकेत पार पडणार आहे. समित्याच्या सभापती पदाचे अर्ज इच्छुकांनी नगरसचिव मुकेश कोळप यांच्याकडे दाखल केले. यावेळी आमदार शंकर जगताप, शहराध्यक्ष शत्रुघ्न काटे, उपमहापौर शर्मिला बाबर, सत्तारुढ पक्षनेते प्रशांत शितोळे आदी उपस्थित होते. स्थायी समितीच्या सभापती पदासाठी अभिषेक बारणे यांनी अर्ज सादर केला आहे. महापालिकेच्या आर्थिक धोरणे, अंदाजपत्रक व खर्च नियंत्रण यामध्ये स्थायी समितीची भूमिका अत्यंत महत्त्वाची असते. त्यामुळे या पदाकडे विशेष लक्ष आहे. शिक्षण समितीच्या सभापती पदासाठी रविना सागर अंगोळकर यांनी उमेदवारी अर्ज दाखल केला आहे. महापालिकेच्या शाळांमधील शैक्षणिक गुणवत्ता, पायाभूत सुविधा आणि विविध उपक्रमांच्या अंमलबजावणीची जबाबदारी या समितीकडे असते. महिला व बाल कल्याण समितीच्या सभापती पदासाठी राणीमाई पठारे यांनी अर्ज केला आहे. महिलांच्या सक्षमीकरणासाठी तसेच बालकल्याण योजनांच्या प्रभावी अंमलबजावणीसाठी ही समिती कार्यरत असते. क्रीडा व सांस्कृतिक समितीच्या सभापती पदासाठी कैलास कुटे यांनी अर्ज दाखल केला असून शहरातील क्रीडा संकुले, सांस्कृतिक कार्यक्रम आणि विविध स्पर्धांच्या आयोजनाची जबाबदारी या समितीकडे असते. शहर सुधारणा समितीसाठी संजय काटे यांनी उमेदवारी अर्ज भरला आहे. शहरातील रस्ते, पायाभूत सुविधा व विकासकामांबाबत महत्त्वाचे निर्णय या समितीद्वारे घेतले जातात. विधी समितीच्या सभापती पदासाठी सुजाता बोराटे यांनी अर्ज दाखल केला आहे. कायदेशीर बाबी, करार व न्यायालयीन प्रकरणांमध्ये या समितीची भूमिका महत्त्वाची मानली जाते. इतर विषय समित्यांच्या सभापती पदांची निवड सोमवारी (दि. २ मार्च) होणार असून, त्यानंतर संबंधित समित्यांचे कामकाज अधिक वेगाने सुरू होण्याची अपेक्षा व्यक्त केली जात आहे.
