प्रभात वृत्तसेवा पिंपरी – महापालिका निवडणुकीमध्ये अनेक दिग्गजांना पराभवाचा सामना करावा लागला आहे. भाजपच्या सत्ताकाळात २०२२ पर्यंत अनेक महत्वाच्या पदांवर काम करत असलेल्या आणि महापालिकेत दबदबा असलेल्या या नेत्यांना मतदारांनी नाकारले असल्याचे समोर आले आहे. त्यामध्ये माजी महापौरांसह, स्थायी समितीचे सभापती, उपमहापौर यांचा समावेश आहे.प्रभाग क्रमांक ३२ मधून भाजपच्या माजी महापौर माई ढोरे पुन्हा रिंगणात होत्या. त्यांच्या विरोधात राष्ट्रवादी काँग्रेसने उज्वला ढोरे यांना उमेदवारी दिली होती. तर शिवसेना उद्धव ठाकरे गटाच्या वर्षा पोंगडे रिंगणात होत्या. तसेच भाजपच्या बंडखोर नगरसेविका शारदा सोनवणे यांनी देखील त्यांना आव्हान दिले होते. बंडखोरी झाल्यामुळे मतांचे विभाजन होऊन माई ढोरे यांना पराभवाचा सामना करावा लागला. दुसरीकडे प्रभाग क्रमांक १७ बिलजीनगर, वाल्हेकरवाडी येथून भाजपचे माजी उपमहापौर सचिन चिंचवडे यांना राष्ट्रवादीचे शेखर चिंचवडे यांनी अस्मान दाखवले आहे. भाजपाने एनवेळी शेखर चिंचवडे यांचे तिकीट कापले. त्यांनी राष्ट्रवादीच्या तिकीटावर निवडणूक लढवत भाजपच्या माजी उपमहापौरांचा पराभव केला आहे. त्याच प्रभागातून माजी सत्तारुढ पक्षनेते नामदेव ढाके यांचा देखील पराभव झाला आहे. राष्ट्रवादी काँग्रेसचे भाऊसाहेब भोईर यांनी त्यांचा पराभव केला आहे.तर स्थायी समितीच्या तब्बल चार सभापतींना पराभवाचा सामना करावा लागला आहे. त्यामध्ये भाजपच्या सत्ताकाळात स्थायी समितीच्या सभापती असलेल्या व आता राष्ट्रवादी काँग्रेसच्या उमेदवार असलेल्या सीमा सावळे यांचा पराभव झाला आहे. त्या प्रभाग क्रमांक ८ मधून निवडणुकीच्या रिंगणात होत्या त्यांच्या विरोधात भाजपचे डॉ. सुहास कांबळे यांनी मैदान मारले आहे. तर त्याच प्रभागातून भाजपचे स्थायी समितीचे माजी सभापती विलास मडेगिरी यांना देखील पराभवाचा सामना करावा लागला आहे. राष्ट्रवादी काँग्रेसचे तुषार सहाणे यांनी त्यांना अस्मान दाखवले आहे. प्रभाग सात भोसरी गावठाणातील भाजपचे स्थायी समितीचे माजी सभापती संतोष लोंढे यांचाही पराभव झाला आहे. याशिवाय भाजपाच्या महिला मोर्चाच्या अध्यक्षा सुजाता पालांडे यांना देखील पराभव झाला आहे. एकूणच या निवडणुकीमध्ये माजी महापौर, स्थायी समितीचे ३ माजी सभापती, सत्तारुढ पक्षनेते आणि उपमहापौर पद सांभाळलेल्या दिग्गजांना पराभवाचा सामना करावा लागला आहे. राष्ट्रवादीलाही झटका माजी आमदार विलास लांडे यांचे पुतणे व राष्ट्रवादी काँग्रेसचे उमेदवार विराज लांडे यांनी त्यांचा पराभव केला आहे. राष्ट्रवादीच्या इतर पदाधिकाऱ्यांना देखील पराभवाचा सामना करावा लागला आहे. यात पक्षाचे निवडणूक प्रचार प्रमुख असलेल्या नाना काटे यांच्या पत्नी माजी नगरसेविका शीतल काटे यांचा देखील पराभव झाला.
