प्रभात वृत्तसेवा पिंपरी – कष्टकरी संघ, महाराष्ट्र राज्य संघटना यांच्यावतीने राष्ट्रवादी काँग्रेस पार्टीच्या प्रभाग १६ मधील अधिकृत पॅनलला गुरुवारी (दि. ८) जाहीर पाठिंबा देण्यात आला. या पाठिंब्याची घोषणा कामगारांचे ज्येष्ठ नेते काशिनाथ नखाते यांनी केली.या पॅनलमध्ये श्रेया अक्षय तरस–गायकवाड, जयश्री मोरेश्वर भोंडवे, आशा तानाजी भोंडवे, मोरेश्वर महादू भोंडवे यांचा समावेश आहे. यावेळी व्यासपीठावर कष्टकरी संघाचे कार्याध्यक्ष राजू बिराजदार, निमंत्रक किरण ताडेकर, तसेच सुनील भोसले, संदीप भोसले, अनिल कदम, सोनू गुप्ता, अरुण जमादार, रोहिदास सातपुते आदी उपस्थित होते. याशिवाय पोलीस पाटील दिवाणजी भोंडवे, अक्षय तरस, तानाजी भोंडवे यांच्यासह भोंडवे कुटुंबातील अनेक सदस्य, राष्ट्रवादी काँग्रेसचे पदाधिकारी, कार्यकर्ते, महिला, युवक आणि परिसरातील नागरिक मोठ्या संख्येने उपस्थित होते. काशिनाथ नखाते म्हणाले, कामगार, श्रमिक आणि मेहनती लोकांचा खरा आवाज विधानसभेत आणि महापालिकेत पोहोचवायचा असेल, तर सर्वसामान्यांच्या प्रश्नांसाठी सातत्याने झटणाऱ्या राष्ट्रवादी काँग्रेस पार्टीच्या उमेदवारांनाच निवडून देणे गरजेचे आहे. घड्याळ या चिन्हासमोरील बटण दाबून संपूर्ण पॅनलला बहुमताने विजयी करा. पॅनल प्रमुख मोरेश्वर भोंडवे यांनी भावनिक शब्दांत सांगितले, कष्टकरी, श्रमिक आणि सामान्य नागरिकांनी दाखवलेला हा विश्वास आमच्यासाठी प्रेरणादायी आहे. हा विश्वास कधीही तडा जाऊ देणार नाही. सर्वांना सोबत घेऊन प्रामाणिकपणे काम करत प्रभाग १६ चा सर्वांगीण विकास साधण्याची आम्ही ग्वाही देतो.
