प्रभात वृत्तसेवा पिंपरी – पिंपरी-चिंचवड महापालिका निवडणुकीच्या पार्श्वभूमीवर प्रभाग क्रमांक १६ मधील राष्ट्रवादी काँग्रेस पार्टीच्या अधिकृत पॅनेलचे उमेदवार मोरेश्वर भोंडवे, जयश्री भोंडवे, आशा भोंडवे, श्रेया अक्षय तरस-गायकवाड यांना अखिल भारतीय भ्रष्टाचार निर्मूलन संघर्ष समितीच्या सर्व सदस्यांनी मंगळवारी (दि. ६) जाहीर पाठिंबा दिला आहे. समितीने प्रसिद्ध केलेल्या निवेदनातून हा पाठिंबा स्पष्ट करण्यात आला. यावेळी पश्चिम महाराष्ट्र अध्यक्ष महेश शिंदे पाटील, पिंपरी चिंचवड शहराध्यक्ष सचिन पाटील, पुणे जिल्हाध्यक्ष ज्योतीराम जाधव, पिंपरी चिंचवड शहर कार्याध्यक्ष ज्ञानेश्वर देवरे, शहर उपाध्यक्ष शहाबाज तांबोळी, विभागीय अध्यक्ष सोपान पाटील, किवळे शाखाध्यक्ष भीमराव खेत्री आदी उपस्थित होते.सामाजिक न्याय, महिला सक्षमीकरण, युवकांना रोजगार, झोपडपट्टी पुनर्वसन, आरोग्य, शिक्षण तसेच मूलभूत नागरी सुविधांच्या प्रश्नांवर राष्ट्रवादी काँग्रेसच्या उमेदवारांची भूमिका ठोस, स्पष्ट व विकासाभिमुख आहे. त्यामुळे प्रभागाच्या सर्वांगीण प्रगतीसाठी हे नेतृत्व आवश्यक असल्याचा विश्वास समितीने व्यक्त केला. प्रभाग क्रमांक १६ मधील पाणीपुरवठा, गटारे, अंतर्गत रस्ते, वीज, आरोग्य सेवा, बेरोजगारी तसेच महिला सुरक्षिततेसारख्या ज्वलंत प्रश्नांवर प्रभावी व परिणामकारक काम करण्याची क्षमता उमेदवारांकडे असल्याचेही निवेदनात नमूद करण्यात आले आहे. लोकांशी थेट संवाद साधणारे, स्वच्छ प्रतिमेचे, संघर्षशील आणि विकासाला प्राधान्य देणारे नेतृत्व म्हणून या पॅनेलकडे पाहिले जात असल्याचे समितीचे मत आहे.प्रभागाच्या पारदर्शक, लोकाभिमुख आणि सर्वसमावेशक विकासासाठी राष्ट्रवादी काँग्रेसच्या उमेदवारांचा विजय आवश्यक असल्याचे सांगत समितीने नागरिकांना आवाहन केले आहे. जाती-धर्माच्या पलिकडे जाऊन विकास व सामाजिक न्यायासाठी प्रभाग १६ चे पॅनल प्रमुख मोरेश्वर भोंडवे, तसेच जयश्री भोंडवे, आशा भोंडवे व श्रेया तरस–गायकवाड यांना विना अट व शर्ती बहुमताने विजयी करण्याचे आवाहन अखिल भारतीय भ्रष्टाचार निर्मूलन संघर्ष समितीच्या सर्व सदस्यांनी केले आहे.
