प्रभात वृत्तसेवा पिंपरी – महापालिका सार्वत्रिक निवडणूक २०२६ च्या पार्श्वभूमीवर प्रभाग क्रमांक १७ अंतर्गत वाल्हेकरवाडी, प्रेमलोक पार्क व चिंचवडेनगर परिसरासाठी राष्ट्रवादी काँग्रेस पार्टीच्या वतीने आयोजित बैठक उत्साहात पार पडली. या बैठकीसाठी राष्ट्रवादी काँग्रेसचे अधिकृत उमेदवार भाऊसाहेब भोईर, शेखर चिंचवडे, मनीषा आरसूळ, शोभा वाल्हेकर यांच्यासह पक्षाचे पदाधिकारी व कार्यकर्ते मोठ्या संख्येने उपस्थित होते. प्रास्ताविक नक्षत्रम एन. बिल्डिंगचे अध्यक्ष संदीप शिंदे यांनी केले. यावेळी त्यांनी प्रेमलोक पार्क व परिसरातील नागरिकांना भेडसावणाऱ्या पाणीपुरवठा, ड्रेनेज, सांडपाणी, नाल्यांची समस्या तसेच मूलभूत सुविधांबाबतच्या अडचणी सविस्तरपणे मांडल्या. भाऊसाहेब भोईर यांनी आपल्या कार्यकाळात प्रभागात झालेल्या विविध विकासकामांसोबत रस्ते, ड्रेनेज, पाणीपुरवठा, नागरी सुविधा अशा केलेल्या अनेक कामांची यादी मांडली. तसेच आगामी काळात प्रभाग १७ ला ‘मॉडेल वॉर्ड’ म्हणून विकसित करण्याचा निर्धार व्यक्त केला. शेखर चिंचवडे म्हणाले, पाणीपुरवठा व ड्रेनेजच्या समस्यांवर कायमस्वरूपी तोडगा काढण्यासाठी पॅनेलचे नगरसेवक क्रियाशील राहतील. प्रेमलोक पार्क परिसरातील नाला बंदिस्त करून सांडपाण्याची समस्या दूर करण्यासाठी विशेष प्रयत्न केले जातील, असे आश्वासनही त्यांनी दिले. या बैठकीत चैतन्य पंडित, प्रशांत पाटील, आनंदा खैरनार, श्रीपाद कुलकर्णी, सत्यजीत चौधरी, राजेश थारकान, प्रतिभा कंकाळे, सुचिता बंडी, स्वाती जांभुळे, समृद्धी पैठणकर, चारुशिला रणसिंग, उल्हास रणसिंग, रमेश केळकर, जगदीश मुंदडा, हनुमंत बहीरगोंडे इतर सभासद,,कार्यकर्ते व नागरिक उपस्थित होते. उपस्थित नागरिकांनीही राष्ट्रवादी काँग्रेसच्या पॅनेलला पाठिंबा दर्शवला.
