प्रभात वृत्तसेवा पिंपरी – पिंपरी-चिंचवड महापालिकेकडून प्रभागनिहाय अंतिम मतदार यादी विक्रीसाठी उपलब्ध करून दिली आहे. आतापर्यंत छापील १३० मतदार यादीची विक्री झाली असून त्यातून पालिकेला १ लाख ७ हजार ९९२ रुपयांचे उत्पन्न मिळाले आहे. महापालिकेने १ ते ३२ प्रभागनिहाय अंतिम मतदार यादी १५ डिसेंबर रोजी प्रसिद्ध केली आहे. महापालिका निवडणुकीची आचारसंहिता देखील लागली आहे. महापालिकेने अंतिम झालेली यादी पालिकेच्या संकेतस्थळावर उपलब्ध करून दिली आहे.महापालिका निवडणूक मतदार यादी कक्ष पिंपरीतील खराळवाडी येथील ज्ञानज्योती सावित्रीबाई फुले स्मारक येथे कार्यरत आहे. या कक्षात, तसेच महापालिकेच्या अ, ब, क, ड, इ, फ, ग आणि ह या आठ क्षेत्रीय कार्यालयात देखील मतदार यादी उपलब्ध करून दिली जात आहे. ज्या उमेदवार व इच्छुकांना यादीची छापील प्रत हवी, त्यांना तिथून दिली जाते. आतापर्यंत महापालिका निवडणूक यंत्रणेकडून एकूण १३० मतादार याद्यांची विक्री झाली. त्यातून महापालिकेला १ लाख ७ हजार ९९२ रुपयांचे उत्पन्न मिळाले आहे. या योजनेचा नागरिकांनी लाभ घ्यावा, असे आवाहन निवडणूक विभागाचे उपायुक्त सचिन पवार यांनी केले आहे.
