प्रभात वृत्तसेवा पिंपरी – पिंपरी चिंचवड महापालिकेची सार्वत्रिक निवडणूक १५ जानेवारीला होत आहे. राज्यामध्ये महायुतीमध्ये एकत्र असलेल्या भाजप आणि राष्ट्रवादी काँग्रेसमध्ये पिंपरी चिंचवड महापालिकेवर सत्ता मिळविण्यासाठी जोरदार रस्सीखेच सुरू आहे. शहरात भाजपाचे चार आमदार असल्याने २०१७ प्रमाणेच यंदाही पालिकेवर एकहाती सत्ता मिळविण्यासाठी पक्षाने फर्मान सोडले आहे. तर, राष्ट्रवादी काँग्रेसचा आणि दस्तुरखुद्द अजित पवार यांचा बालेकिल्ला मानला जाणाऱ्या पिंपरी चिंचवडवर राष्ट्रवादीचा झेंडा फडकविण्यासाठी स्वतः उपमुख्यमंत्री अजित पवार यांनी लक्ष घातले आहे. त्यामुळे शहरातील भाजपचे चार आमदार विरुद्ध उपमुख्यमंत्री अजित पवार यांच्यात सामना रंगला असून उपमुख्यमंत्री पवार यांची प्रतिष्ठा पणाला लागली आहे. शहरामध्ये भोसरीत महेश लांडगे, चिंचवडमध्ये शंकर जगताप तर विधानपरिषदेचे उमा खापरे आणि अमित गोरखे असे मिळून चार आमदार आहेत. पिंपरी विधानसभा मतदारसंघामध्ये राष्ट्रवादी काँग्रेसचे अण्णा बनसोडे आमदार असून त्यांच्याकडे विधानसभेचे उपाध्यक्ष हे मानाचे पद आहे. राज्यात महायुती असल्याने महापालिका निवडणुकांमध्ये नेमकं काय होणार याबाबत उत्सुकता असतनाचा दोन्हीही पक्षांनी स्वतत्र लढणार असल्याचे निर्णय जाहीर केले. त्यानंतर लागलीच एकमेकांना धक्के देत दोन्ही पक्षानी एकमेकांचे पदाधिकारी फोडत निवडणुकीची वात पेटवली. त्यानंतर आता निवडणुकीचे रण तापले असून दोन्ही पक्षांमध्ये हा चुरशीचा सामना होणार असल्याचे स्पष्ट झाले. सन २०१७ पूर्वी पिंपरी चिंचवड महापालिकेवर राष्ट्रवादी काँग्रेसची निर्विवाद सत्ता येत होती. २०१४ मध्ये राज्यात सत्ताबदल झाल्यानंतर शहरातील वातावरण देखील बदलले. अजित पवार यांच्या वळचणीला असलेल्या नेत्यांनी अजितदादांची साथ सोडत फडणवीस यांच्या नेतृत्वात भाजपचा रस्ता धरला. परिणामी, २०१७ मध्ये राष्ट्रवादीची सत्ता जात महापालिकेमध्ये भाजपाची सत्ता आली. अजित पवार यांच्याच तालमीत तयार झालेले पैलवान दुसऱ्या गोटात सामील होत त्यांना दिलेला धक्का पवार यांच्या जिव्हारी लागला. त्यानंतर चिंचवड विधानसभेची झालेली पोटनिवडणूक, २०२४ ला झालेली विधानसभा निवडणूक (पिंपरी अपवाद वगळता) यामध्ये अजित पवार यांच्या पक्षाला शहरामध्ये वर्चस्व निर्माण करण्यासाठी स्थान मिळवता आले नाही.असे असताना आता महापालिकेमध्ये पुन्हा आपला दबदबा तयार करण्यासाठी अजित पवार कामाला लागले आहेत. काहीही झाले तरी पिंपरी चिंचवड महापालिकेमध्ये महापौर राष्ट्रवादीचाच बसवणार असे जाहीर करत पवार यांनी निवडणुकीसाठी कंबर कसली आहे. मुख्यमंत्री देवेंद्र फडणवीस यांचे दुर्लक्ष? उपमुख्यमंत्री अजित पवार यांनी शहरात वैयक्तिक लक्ष घातले आहे. असे असताना भाजपाचे नेते व मुख्यमंत्री देवेंद्र फडणवीस यांनी मात्र शहराच्या राजकारणातून लक्ष काढले असल्याची चर्चा आहे. पुणे शहरामध्ये नुकतीच विकासकामांची उद्घाटने घेतली असताना पिंपरी चिंचवड शहरात असे निवडणुकीसाठीचे कार्यक्रम घेणे त्यांनी टाळले आहे. दुसरीकडे शनिवारी शहरातून झालेले अनेक पक्षप्रवेश करून घेण्यासाठी देखील ते हजर नव्हते. त्यामुळे पिंपरी चिंचवड महापालिका फडणवीस यांनी अजित पवार यांना सोडली आहे का? अशी चर्चा रंगू लागली आहे.
