PCMC – मार्च २०२२ नंतर तब्बल ४७ महिन्यांच्या ब्रेकनंतर पिंपरी चिंचवड महापालिकेची सर्वसाधारण सभा शुक्रवारी (दि. ६) होत आहे. कोरोनाचा प्रादुर्भाव, आरक्षणाचा तिढा यामुळे निवडणुका लांबणीवर पडल्याने दोन महासभांमध्ये जवळपास १४५० दिवसांचा खंड पडला आहे. आज महापौर व उपमहापौर यांची निवड होणार असल्यामुळे चार वर्षांपासून सुरू असलेली प्रशासकीय राजवटही संपुष्टात येणार आहे.पिंपरी चिंचवड महापालिकेची पहिली सार्वत्रिक निवडणूक १९८६ साली पार पडली होती. त्यावेळी एकूण ६० वॉर्ड होते. सन १९९२ व सन १९९७ ला एक वॉर्ड पद्धतीने निवडणूक झाली. सन १९९२ मध्ये ७८ वॉर्ड तर, १९९७ ला ७९ वॉर्ड होते. सन २००२ ला तीन सदस्यीय प्रभाग पध्दतीने निवडणूक झाली. त्या वेळी एकूण ३५ प्रभाग होते. सन २००७ ला पुन्हा एक सदस्य पध्दतीने निवडणूक घेण्यात आली. त्यात एकूण १०५ वॉर्ड होते. सन २०१२ ला दोन सदस्यीय प्रभाग पध्दतीने निवडणुका घेण्यात आल्या. त्यात ६४ प्रभाग होते. चार सदस्यीय पद्धतीने फेब्रुवारी २०१७ ला निवडणुका झाल्या. एकूण ३२ प्रभागात एकूण १२८ नगरसेवक आहेत. त्याचपद्धतीने आताही निवडणूका झाल्या असून १२८ नगरसेवकांची निवड झाली आहे.सन १९८६ ला निवडणूक झाल्यानंतर अखंडितपणे प्रत्येक महिन्याला सर्वसाधारण सभांचे आयोजन होत होते. निवडणुकानंतर व अर्थसंकल्पासाठी विशेष सभांचेही आयोजन करण्यात येत होते. अपवाद वगळता प्रत्येक आठवड्यात स्थायी समितीची व प्रत्येक महिन्याला विशेष समित्यांची सभा घेण्यात येत होती. मार्च २०२२ मध्ये शेवटची सर्वसाधारण सभा आयोजित केली होती. त्या सभेमध्ये विविध कामांना मंजुरी देण्यात आली होती. त्यानंतर राज्यात व शहरात सुरू असलेली कोरोनाची लाट यामुळे निवडणूक प्रक्रिया थांबली. पुढे यामध्ये आरक्षणाचा तिढा आला त्यामुळे निवडणुकीची प्रक्रिया वारंवार पुढे ढकलण्यात आली. आता तब्बल चार वर्षानंतर ही निवडणूक पार पडली असून महापालिकेत नगरसेवकांची एन्ट्री झाली आहे. ४७ महिन्यांच्या ब्रेकनंतर होणाऱ्या सभेविषयी नगरसेवकांसह शहरवासीयांचेही लक्ष लागले आहे. आज महापौर, उपमहापौर पदासाठी निवडणूक होणार असून महापौर दालन सज्ज करण्यात आले आहे. भाजप – राष्ट्रवादी काँग्रेस भाजप आणि राष्ट्रवादीमध्ये उपमहापौरपदासाठी लढत आजच्या सर्वसाधारण सभेत महापौर व उपमहापौर यांची नियुक्ती केली जाणार आहे. भाजपच्या वतीने महापौर पदासाठी रवी लांडगे यांचा अर्ज दाखल करण्यात आला आहे. तर राष्ट्रवादी काँग्रेसने महापौर पदासाठी अर्ज दाखल न केल्याने रवी लांडगे यांची बिनविरोध निवड होणार आहे. उपमहापौर पदासाठी भाजपाने शेवटच्याक्षणी शर्मिला बाबर यांचा अर्ज दाखल केला आहे. तर राष्ट्रवादीने वैशाली काळभोर यांचा अर्ज दाखल केला आहे. बाबर आणि काळभोर यांच्यापैकी उपमहापौर कोण होणार हे सभागृहामध्ये मतदानानंतर ठरणार आहे. मात्र, सर्वात मोठा पक्ष भाजप ठरला असून त्यांच्याकडे ८५ नगरसेवकांचे संख्याबळ असल्याने शर्मिला बाबर याच उपमहापौर होणार असल्याचे निश्चित आहे. पहिलीच सभा होईल तहकूब महापौर निवडीनंतर महापौर विरोधी पक्षनेतेपद व सभागृह नेत्यांची नावांची घोषणा करतील. भाजपच्या वतीने सभागृह नेत्यासाठी प्रशांत शितोळे यांची निवड करण्यात आली आहे. तर राष्ट्रवादी काँग्रेसने भाऊसाहेब भोईर यांची गटनेतेपदी निवड केल्याने ते विरोधी पक्षनेते होतील. याशिवाय १० जणांची स्वीकृत सदस्य म्हणून नियुक्ती करण्यात येणार आहे. तसेच स्थायी समितीच्या १६ सदस्यांची देखील नियुक्ती महासभेमध्ये केली जाते. मात्र, आज फक्त महापौर उपमहापौर यांचीच निवड केली जाण्याची शक्यता आहे. त्यानंतर दिवंगत अजितदादा पवार यांना श्रद्धांजली अर्पण करून महासभा तहकूब करण्यात येईल. स्वीकृतपदावर कोणाची वर्णी लागणार? महासभेत १० स्वीकृत नगरसेवकांची नियुक्ती केली जाणार आहे. भाजपचे ७ आणि राष्ट्रवादी काँग्रेसच्या ३ सदस्यांची निवड करण्यात येईल. शिंदेच्या शिवसेनेला एकही स्वीकृत पद मिळणार नाही. मात्र, स्वीकृत सदस्यांची निवड देखील पुढील सभेत करण्यात येईल. स्थायी समितीसाठी मोर्चेबांधणी महापालिकेची तिजोरी म्हणून स्थायी समिती ओळखली जाते. या समितीवर संख्याबळावर आधारित १६ सदस्यांची नियुक्ती केली जाणार आहे. ही निवडही पुढील सभेतच केली जाण्याची शक्यता आहे. स्थायी समितीवर निवड व्हावी, यासाठी भाजप व राष्ट्रवादी काँग्रेसच्या नगरसेवकांमध्ये स्पर्धा सुरू झाली आहे.
