Opposition Leader PCMC – राष्ट्रवादी काँग्रेसने आपल्या ३६ नगरसेवकांसह पुणे विभागीय आयुक्तालयात बुधवारी (दि. ४) गट नोंदणी केली. शहराध्यक्ष योगेश बहल यांनी ज्येष्ठ नगरसेवक भाऊसाहेब भोईर यांचे नाव गटनेते म्हणून दिले. त्यानुसार, पिंपरी चिंचवड महापालिकेच्या विरोधी पक्षनेतेपदी ज्येष्ठ नगरसेवक भाऊसाहेब भोईर यांची निवड करण्यात आली आहे. निवडणुकीच्या प्रचारामध्ये दिवंगत अजितदादा पवार यांनी भाजपच्या कारभारावर सडकून टीका केली होती. निवडणूक पार पडल्यानंतर देखील आतातरी भाजपच्या कारभारावर तोंड उघडा असा सज्जड दम दिला होता. त्यामुळे आता त्यांच्या पश्चात महापालिका सभागृहामध्ये विरोधी पक्षनेते भोईर यांच्या नेतृत्वात राष्ट्रवादी काँग्रेस भाजपला कडवे आव्हान देणार का? याबाबत राजकीय वर्तुळात चर्चा सुरू झाली आहे. महापालिकेमध्ये २०१७ साली भाजपाची सत्ता आली. त्यापूर्वी राष्ट्रवादी काँग्रेसचा बालेकिल्ला असलेली महापालिका राष्ट्रवादीच्या हातातून गेली. २०२२ ला या नगरसेवकांचा काळ संपून प्रशासकीय राजवट लागू झाली. भाजपच्या सत्ताकाळाचे पाच आणि प्रशासकीय राजवटीचे चार अशा नऊ वर्षांच्या कारभारावर दिवंगत अजितदादा पवार यांनी निवडणुकीमध्ये सडकून टीका केली. तर भाजपाने महापालिकेमध्ये मोठ्या प्रमाणावर भ्रष्टाचार केला असून महापालिका कर्जबाजारी केली असल्याचा आरोप केला. निवडणुकीपूर्वी भाजपाची एकहाती सत्ता येईल असे वातावरण असताना अजितदादांनी या निवडणुकीमध्ये प्राण फुंकले. पत्रकार परिषद आणि सभांच्या माध्यमातून त्यांनी भाजपवर हल्ला केला. मात्र, स्थानिक नेत्यांची साथ मिळत नसल्याचे सांगत त्यांनी माझंच मीठ अळणी असल्याचे सांगितले. तर, निवडणुकीनंतरही आतातरी तोंड उघडा असे म्हणत भाजपच्या चुकीच्या कारभारावर विरोध करण्याचे आदेश दिले होते. त्यामधून पुढील पाच वर्ष भाजपच्या चुकीच्या कामांना सभागृहात विरोध करा असा अप्रत्यक्ष संदेश निवडून आलेल्या नगरसेवकांना दिला होता. अजित पवार महापौर निवडीनंतर महापालिकेमध्ये सभागृह सुरू होऊन भाजपच्या सत्तेला सुरूवात होणार आहे. विरोधी पक्षनेते म्हणून भाऊसाहेब भोईर यांची निवड झाली असून आता सभागृहामध्ये प्रमुख विरोधक म्हणून राष्ट्रवादी काँग्रेस असणार आहे. दिवंगत अजितदादा यांनी केलेले आरोप आणि पिंपरी चिंचवड शहरामध्ये आखून दिलेल्या विकासाच्या रोडमॅपसाठी राष्ट्रवादीला काम करावे लागणार आहे. त्यासाठी सभागृहात बहुमतांच्या जोरावर चुकीच्या कामांना मंजुरी देत असताना राष्ट्रावादीला भाजपवर तुटून पडावे लागणार आहे. एका चांगल्या विरोधी पक्षाची भूमिका बजावत सत्ताधाऱ्यांना चुकीच्या कामांपासून रोखत अजितदादांच्या स्वप्नातील शहर घडविण्यासाठी सजग राहवे लागणार आहे. आक्रमक विरोधी पक्षाची भूमिका बजावणे आवश्यक महापालिकेची निवडणूक जाहीर झाल्यानंतर भाजप आणि राष्ट्रवादीने राज्यात एकत्रित सत्तेत असतानाही वेगळे लढण्याचा निर्णय घेतला. त्यावेळी ही नुराकुस्ती असल्याची चर्चा राजकीय वर्तुळात झाली. मात्र अजित पवार सत्ताधाऱ्यांच्या कारभारावर टीका करत निवडणूक चुरशीची केली. तर शहरामध्ये गावकी भावकीमध्येच राजकारण फिरत असल्याची चर्चा आहे. आता राष्ट्रवादीने गावकी भावकीचे हित लक्षात न घेता आक्रमक विरोधी पक्षाची भूमिका बजावणे आवश्यक आहे. सत्ताधारी आणि विरोधक यांच्यात नूराकुस्ती होऊ नये, अशी अपेक्षा व्यक्त केली जात आहे. कोण आहेत भाऊसाहेब भोईर? भाऊसाहेब भोईर हे राष्ट्रवादी काँग्रेसमधील ज्येष्ठ नगरसेवक आहेत. सन १९९२ साली सर्वात तरुण नगरसेवक म्हणून त्यांची पिंपरी चिंचवड महापालिकेत निवड झाली होती. शहराच्या सांस्कृतिक जडणघडणीमध्ये त्यांचे मोठे योगदान आहे. त्यांनी शहरात अखिल भारतीय नाट्य परिषदेची स्थापना केली आहे. आतापर्यंत ते सहा वेळा नगरसेवक झाले असून २०१० साली त्यांनी महापालिकेचे विरोधी पक्षनेतेपद भूषवले होते. महापालिकेच्या विधी समिती व शिक्षण समितीच्या सदस्यपदी त्यांनी काम केले आहे. विविध प्रतिष्ठित पुरस्काराने त्यांचा सन्मान झाला आहे. शंभरावे राज्य नाट्य संमेलन शहरात आयोजित करण्याचे श्रेयही त्यांनाच जाते.
