प्रभात वृत्तसेवा वडगाव मावळ – आमदार सुनील शेळके यांच्या मार्गदर्शनाखाली इंदोरी पंचायत समिती गणातील शेतकरी बांधवांसाठी सुनील भोंगाडे यांच्या वतीने शेतकरी मेळावा शुक्रवारी (दि. १९) उत्साहात पार पडला.इंदोरी गणामध्ये सुनील भोंगाडे हे गेल्या अनेक वर्षांपासून स्वतः शेतकरी म्हणून कार्यरत असून, त्यांनी शेतकरी हितासाठी विविध समाजोपयोगी उपक्रम राबविले आहेत. शेतकऱ्यांना भरीव मार्गदर्शन मिळावे आणि त्यांच्या शेती विकासाला चालना मिळावी, या उद्देशाने या मेळाव्याचे आयोजन करण्यात आले होते.या मेळाव्यात पंचायत समिती मावळ तसेच कृषी अधिकारी साळे आणि अधिकाऱ्यांनी शेतकऱ्यांना मोलाचे मार्गदर्शन केले. शेतीसाठी उपयुक्त साहित्यामध्ये फवारणी पंप, कोळपणी यंत्र, विळा, खुरपे, तसेच टोमॅटो, वांगी, मिरची यांची सुमारे दहा हजार रोपे, तणनाशक आणि फवारणी औषधे यांचे लकी ड्रॉ पद्धतीने वाटप करण्यात आले. या उपक्रमाचा लाभ इंदोरी गणातील सुमारे ७०० शेतकऱ्यांनी घेतला.मेळाव्याप्रसंगी तालुक्यातील राष्ट्रवादी काँग्रेसचे ज्येष्ठ नेते बबनराव भेगडे, कृषी उत्पन्न बाजार समितीचे माजी सभापती बबनराव भोंगाडे, मावळ विधानसभा राष्ट्रवादी काँग्रेस पार्टी अध्यक्ष गणेश खांडगे, इंदोरीचे सरपंच शशिकांत शिंदे, भंडारा डोंगर ट्रस्टचे सदस्य आणि जांबवडे गावचे माजी पोलीस पाटील जगन्नाथ पाटील, ज्येष्ठ नेते बजरंग जाधव, प्रशांत भागवत, सरपंच पल्लवी दाभाडे आदी मान्यवर उपस्थित होते. मान्यवरांच्या हस्ते संपूर्ण इंदोरी गणातील दहा शेतकऱ्यांची कृषीनिष्ठ शेतकरी म्हणून निवड करून त्यांना सन्मानचिन्ह, शाल व श्रीफळ देऊन गौरविण्यात आले. लकी ड्रॉमधील बक्षिसांचे वितरण झाल्यानंतर उर्वरित शेतकऱ्यांसाठी मोफत भेटवस्तू देण्यात आल्या. सुमारे १,२०० शेतकरी या मेळाव्यास उपस्थित होते.
