पिंपरी, दि. १५ (प्रतिनिधी) – चिंचवडगाव येथील उर्दू शाळेतील मतदान केंद्रावर मतदान प्रक्रियेदरम्यान इलेक्ट्रॉनिक मतदान यंत्रणेसंदर्भात गोंधळ निर्माण झाल्याने काही काळ तणावाचे वातावरण निर्माण झाले. मशाल या निवडणूक चिन्हाचे बटन दाबल्यानंतर कमळ या चिन्हाची लाईट लागत असल्याचा आरोप उपस्थित करण्यात आल्याने मतदान केंद्रावर गोंधळ उडाला. या घटनेची माहिती मिळताच संबंधित उमेदवारांचे प्रतिनिधी आणि मतदान अधिकाऱ्यांनी तत्काळ आक्षेप नोंदवत निवडणूक प्रशासनाकडे तक्रार केली. यानंतर खबरदारीचा उपाय म्हणून काही काळ मतदान प्रक्रिया थांबवण्यात आली. या प्रकारामुळे मतदारांमध्ये संभ्रम निर्माण झाला असून मतदान केंद्र परिसरात गर्दी वाढली होती. घटनेची दखल घेत पोलीस प्रशासन तात्काळ घटनास्थळी दाखल झाले. परिस्थिती नियंत्रणात ठेवण्यासाठी अतिरिक्त पोलीस बंदोबस्त तैनात करण्यात आला. तसेच निवडणूक निर्णय अधिकारी आणि तांत्रिक पथकाला तातडीने घटनास्थळी पाचारण करण्यात आले. संशयित मतदान मशीनची तपासणी सुरू असून त्याचा तांत्रिक अहवाल घेतला जात असल्याची माहिती सूत्रांकडून देण्यात आली. निवडणूक प्रशासनाकडून प्राथमिक पाहणीत तांत्रिक बिघाड झाला आहे की मतदारांच्या गैरसमजामुळे हा प्रकार घडला आहे, याची सखोल चौकशी सुरू आहे. नियमांनुसार आवश्यक असल्यास संबंधित मतदान मशीन बदलून मतदान प्रक्रिया सुरळीत सुरू ठेवण्यात येईल, असे अधिकाऱ्यांनी स्पष्ट केले. दरम्यान, मतदान प्रक्रिया पारदर्शक, निर्भय आणि विश्वासार्ह राहावी यासाठी सर्व आवश्यक उपाययोजना करण्यात येत असून कोणताही अनुचित प्रकार घडू नये याची खबरदारी घेतली जात असल्याचे प्रशासनाकडून सांगण्यात आले. या घटनेमुळे काही काळ चिंचवडगाव उर्दू शाळेतील मतदान केंद्रावर मतदान प्रक्रिया विस्कळीत झाली होती. मात्र प्रशासनाच्या हस्तक्षेपानंतर परिस्थिती नियंत्रणात आली असून पुढील तपास व कार्यवाही सुरू आहे. ज्येष्ठ नागरिकांना कोणते बटन दाबायचे ते लवकर समजले नाही. त्यांनी बटणाच्या जागी बाजूला असलेली खून अनेकवेळा दाबली. त्यामुळे गोंधळ निर्माण झाला. मात्र कोणतेही मशीन बंद झालेले नसून मतदान देखील थांबले नाही. – सचिन पवार, उपआयुक्त
