Sakshi Tanwar Birthday: छोट्या पडद्यावरील लोकप्रिय अभिनेत्री साक्षी तंवर आज आपला ५३वा वाढदिवस साजरा करत आहे. अभिनय, साधेपणा आणि ठाम व्यक्तिमत्त्वामुळे साक्षीने प्रेक्षकांच्या मनात वेगळं स्थान निर्माण केलं आहे. या खास दिवशी तिच्या करिअर आणि वैयक्तिक आयुष्याशी संबंधित काही चर्चित व ऐकलेल्या किस्स्यांकडे नजर टाकूया. IAS होण्याचं स्वप्न, पण नशिबाने दिली अभिनयाची वाट १२ जानेवारी १९७३ रोजी राजस्थानमधील अलवर येथे जन्मलेल्या साक्षी तंवरने दिल्ली विद्यापीठातून शिक्षण घेतलं. तिचं स्वप्न IAS अधिकारी होण्याचं होतं. मात्र एका मैत्रिणीच्या सांगण्यावरून तिने सहज म्हणून दूरदर्शनच्या ‘अलबेला सुर मेला’ या कार्यक्रमासाठी ऑडिशन दिलं आणि तिथूनच तिच्या अभिनय प्रवासाला सुरुवात झाली. ‘कहानी घर घर की’ने दिली घराघरात ओळख सन २००० मध्ये एकता कपूरच्या ‘कहानी घर घर की’ या मालिकेत साक्षीने ‘पार्वती’ ही भूमिका साकारली. ही मालिका जवळपास ८ वर्षे चालली आणि साक्षी टीव्हीवरील सर्वात लोकप्रिय ‘संस्कारी सून’ ठरली. त्यानंतर २०११ मध्ये आलेल्या ‘बडे अच्छे लगते हैं’ या मालिकेने तिला पुन्हा एकदा प्रेक्षकांच्या मनात स्थान मिळवून दिलं. किसिंग सीनमुळे वाद ‘बडे अच्छे लगते हैं’ या मालिकेत साक्षी तंवर आणि राम कपूर यांच्यातील जवळपास १७ मिनिटांचा इंटिमेट सीन प्रचंड चर्चेत आला होता. या सीनमध्ये किसिंग सीनही होता, ज्यामुळे टीव्हीवर अशा प्रकारचे सीन दाखवण्यावरून मोठा वाद झाला. अनेकांनी टीका केली, तर स्वतः साक्षीनेही हा सीन केल्यानंतर आपण भावनिकदृष्ट्या खूप अस्वस्थ झाल्याचं सांगितलं होतं. 2000 कोटींच्या ‘दंगल’चा भाग टीव्हीवर यश मिळवल्यानंतर साक्षीने चित्रपटांकडेही वळण घेतलं. २०१६ मध्ये आमिर खानच्या ‘दंगल’ चित्रपटात तिने त्याच्या पत्नीची भूमिका साकारली. या चित्रपटाने जागतिक पातळीवर २००० कोटी रुपयांहून अधिक कमाई केली. वेब सीरिज आणि वेगळ्या भूमिका साक्षीने ‘मोहल्ला अस्सी’, ‘शर्मा जी की बेटियां’ यांसारख्या चित्रपटांत काम केलं. वेब सीरिजमध्येही ती वेगळ्या अंदाजात दिसली. २०२५ मध्ये आलेल्या ‘द रॉयल्स’ या सीरिजमध्ये तिची भूमिका विशेष गाजली. लग्न नाही, पण आई आहे साक्षी तंवरने आपलं खासगी आयुष्य प्रसिद्धीपासून दूर ठेवलं. तिने आजपर्यंत लग्न केलं नाही. मात्र २०१८ मध्ये तिने ९ महिन्यांच्या दित्या नावाच्या मुलीला दत्तक घेतलं आणि ती एक सिंगल मदर म्हणून तिचं संगोपन करत आहे. साक्षी तंवरबद्दल काही खास गोष्टी अभिनयात येण्याआधी साक्षी एका ज्वेलरी शॉपमध्ये काम करत होती; तिला महिन्याला फक्त ९०० रुपये मिळत होते. मास कम्युनिकेशनचा प्रवेश परीक्षेत ती नापास झाली होती. २०२२ मध्ये फोर्ब्स इंडियाच्या यादीत तिचा समावेश झाला. साक्षीने दोन इंडियन टेलिव्हिजन अकादमी अवॉर्ड्स पटकावले आहेत. साधेपणा, मेहनत आणि गुणवत्तेच्या जोरावर साक्षी तंवरने आपली वेगळी ओळख निर्माण केली आहे. तिच्या वाढदिवसानिमित्त तिला मनापासून शुभेच्छा!
