नाशिक : क्रीडा विश्वातून एक दुःखद बातमी समोर आली आहे. नाशिक जिल्ह्याने महाराष्ट्र रणजी संघाला अनेक क्रिकेटपटू दिले आहेत. त्यापैकी एक असलेले माजी रणजीपटू रमेश वैद्य यांचे आज मुंबई येथे निधन झाले. ते ७७ वर्षाचे होते. नाशिक जिल्ह्याचे ते प्रसिद्ध अष्टपैलू डावखुरे क्रिकेटपटू होते. क्रिकेटमधून निवृत्त झाल्यानंतरदेखील त्यांनी नाशिक जिल्हा क्रिकेट संघटनेला तसेच युवा खेळाडूंना योग्य ते मार्गदर्शन केले. मात्र आज त्यांच्या रूपाने नाशिक जिल्हा क्रिकेट संघटनेने एक उमदा आणि सदाबहार क्रिकेटप्रेमी गमावल्याची भावना व्यक्त होत आहे. रमेश वैद्य यांनी १७ वर्षे नाशिक जिल्हा क्रिकेट संघाचे प्रतिनिधित्व केले. त्यातील तीन वर्षे त्यांनी संघाचे कर्णधारपदही भूषवले. नांदेड येथे १९८० साली झालेल्या मुंबईविरुद्धच्या रणजी सामन्यात त्यांना खेळण्याची संधी मिळाली. यानंतर त्यांनी या संधीच सोनं केलं. त्यांनी या सामन्यात श्रीधर मुंडलेचा सूर मारून घेतलेला झेल आजही सगळ्यांच्या लक्षात आहे. त्यांच्यासारख्या शैलीदार फलंदाजाला अधिक संधी मिळायला हवी होती असे त्यांचा खेळ बघितलेल्या सर्वांचेच मत होते. मात्र त्यांना हि संधी मिळाली नाही. मात्र त्यांनी हार मानली नाही. क्रिकेटपटू म्हणून निवृत्त झाल्यानंतरही ते शांत बसले नाहीत. अर्थात अंगात क्रिकेट भिनलेले रमेश वैद्य शांत बसणे शक्यच नव्हते. निवृत्तीनंतर त्यांनी निवड समितीवर, संघ व्यवस्थापक तसेच प्रशिक्षक म्हणून महाराष्ट्र क्रिकेट संघटना तसेच नाशिक जिल्हा क्रिकेट संघटनेत अनेक वर्ष अतिशय उत्साहाने काम केले. त्यांचे क्रिकेटवर जबरदस्त प्रेम होते. ते क्रिकेटलाच जीवन मानत. नाशिक जिल्हा क्रिकेट विषयी त्यांना खूप आस्था होती. नाशिकमध्ये आयोजित सर्व रणजी तसेच भारतीय क्रिकेट नियामक मंडळातर्फे (बीसीसीआय) आयोजित इतर कोणत्याही सामन्यांना ते आवर्जून उपस्थित राहून खेळाचा पुरेपूर आनंद घ्यायचे. अलीकडेच नोव्हेंबरमध्ये नाशिक येथे झालेल्या रणजी सामन्यासही त्यांची पूर्णवेळ उपस्थिती होती. रमेश वैद्य हे कायमच म्हणजे अगदी उतारवयातही तरुणांप्रमाणे जगले. डोक्यावर नवोदितांप्रमाणे कॅप आणि अंगात टी शर्ट याच रुपात ते कायम दिसायचे. ज्या नाशिकने क्रिकेटपटू म्हणून आपणास मोठे केले, त्या नाशिकमधून उत्तमोत्तम क्रिकेटपटू घडोत, अशी त्यांची इच्छा होती. नाशिक जिल्हा क्रिकेट संघटनेने त्यांना २००३ साली जीवन गौरव पुरस्काराने गौरविण्यात आले होते. त्यांच्या निधनाबद्दल नाशिक क्रिकेट विश्वात दु:ख व्यक्त करण्यात येत आहे. नाशिक जिल्हा क्रिकेट संघटनेचे अध्यक्ष विनोद शहा, सचिव समीर रकटे, सर्व पदाधिकारी, इतर सर्व संबधितांनी रमेश वैद्य यांच्या निधनाबद्दल आपल्या भावना व्यक्त करुन त्यांना श्रद्धांजली वाहिली आहे.
