पुणे ग्रामीण पोलिसांचा मोठा खुलासा; ड्रग्ज रॅकेटमध्ये पोलीस कर्मचाऱ्याचाच सहभाग समोर आल्याने गृहविभागाच्या कार्यपद्धतीवर प्रश्नचिन्ह. Shirur Drug Case: शिरूर- पुणे ग्रामीण स्थानिक गुन्हे शाखा आणि शिरूर पोलिसांनी उघडकीस आणलेल्या २० कोटी रुपयांच्या एमडी ड्रग्ज प्रकरणाला आता एक धक्कादायक वळण मिळाले आहे. या रॅकेटचा मुख्य सूत्रधार अहिल्यानगर स्थानिक गुन्हे शाखेतील (LCB) पोलीस हवालदार श्यामसुंदर रामदास गुजर (वय ३९) असल्याचे निष्पन्न झाले असून त्याला अटक करण्यात आली आहे. पोलिसांनी जप्त केलेल्या अंमली पदार्थांच्या मुद्देमालाचीच चोरी करून तो काळ्या बाजारात विकत असल्याची माहिती समोर आल्याने पोलीस दलात मोठी खळबळ उडाली आहे.दरम्यान, समोर आलेल्या माहितीनुसार, श्यामसुंदर गुजर हा अहिल्यानगर पोलीस अधीक्षक कार्यालयातील मुद्देमाल कक्षाशी संबंधित काम पाहत होता. नार्को टेस्ट आणि अंमली पदार्थांच्या पत्रव्यवहाराची जबाबदारी त्याच्याकडेच होती. ज्या कक्षात जप्त केलेले ड्रग्ज ठेवले जायचे, त्या कक्षाची चावी नियमबाह्य पद्धतीने गुजरकडेच असायची. याच अधिकाराचा गैरवापर करून तो मुद्देमालातून ड्रग्ज चोरत असे आणि चोरी उघड होऊ नये म्हणून त्याऐवजी तितक्याच वजनाचा मैदा मिसळून वजनाची भरपाई करत असे. हा चोरीचा माल तो माऊली शिंदे व इतर तस्करांच्या माध्यमातून शिरूर आणि ग्रामीण भागात विकत होता. अटक करण्यात आलेल्या गुजरची कारकीर्द यापूर्वीही वादग्रस्त राहिली आहे. पारनेर पोलीस ठाण्यात कार्यरत असतानाही त्याच्याविरोधात सामाजिक संघटनांनी तक्रारी केल्या होत्या. श्रीरामपूर आणि संगमनेर परिसरातून जप्त करण्यात आलेल्या कोट्यवधींच्या ड्रग्ज साखळीशीही त्याचे लागेबांधे असण्याची शक्यता आता वर्तवली जात आहे. पोलिसांनी जप्त केलेला माल सुरक्षित ठेवण्याची जबाबदारी असलेल्या व्यक्तीनेच तो विकल्याने गृहविभागाच्या कार्यपद्धतीवर गंभीर प्रश्नचिन्ह निर्माण झाले आहे.या प्रकरणी पोलीस दलाची प्रतिमा मलीन झाल्याने वरिष्ठ अधिकाऱ्यांनी गुजर याच्यावर कठोर फौजदारी कारवाईसह सेवेतून बडतर्फ करण्याचे संकेत दिले आहेत. या रॅकेटमध्ये पोलीस दलातील आणखी काही कर्मचाऱ्यांचा सहभाग आहे का, तसेच त्याने आजवर किती वेळा अशा प्रकारे मुद्देमालाची अफरातफर केली, याचा सखोल तपास पुणे ग्रामीण पोलिसडून सुरू आहे. रक्षकच भक्षक बनल्याच्या या प्रकारामुळे पारदर्शक तपासाची मागणी नागरिक करत आहेत.
