प्रभात वृत्तसेवा पुणे – नववर्षाच्या पार्श्वभूमीवर पुणे पोलिसांनी अमली पदार्थ विक्रेत्यांविरुद्ध कारवाई केली आहे. पिंपरीत एका सदनिकेवर छापा टाकून हायड्रोपोनिक गांजा जप्त केला. सदनिकेतच हायड्रोपोनिक गांजाची लागवड केल्याचे आढळले. याप्रकरणी अटक केलेल्या आरोपींने मिळालेल्या माहितीनंतर पुणे, पिंपरीसह मुंबई, गोव्यात कारवाई केली. कारवाईत पोलिसांनी मेफेड्रोन, ओझीकुश (हायड्रोपोनिक गांजा), चरस, एलएसडीसह वेगवेगळ्या प्रकारचे अमली पदार्थ जप्त केले. जप्त केलेल्या अमली पदार्थांंची किंमत साडेतीन कोटी रुपये आहे.तुषार चेतन वर्मा (वय २१, सध्या रा. शितळादेवीनगर, सूस, मूळ रा. दिल्ली), सुमीत संतोष डेडवाल (वय २५, सध्या रा. मधुबन काॅलनी, सांगवी, मूळ रा. शिक्षक काॅलनी, गंगापूर, छत्रपती संभाजीनगर), अक्षय सुखलाल महेर (वय २५, सध्या रा. एक्सर्बिया टाऊनशिप, हिंजवडी, मूळ रा. प्रगती काॅलनी, गंगापूर, छत्रपती संभाजीनगर), मलय राजेश डेलीवाला (वय २८, रा. अमृतनगर, घाटकोपर, मुंबई), स्वराज अनंत भोसले (वय २८, रा. खोत चाळ, कुर्ला, मुंबई) अशी अटक केलेल्यांची नावे आहेत. आरोपी तुषार वर्मा अमली पदार्थांची विक्री करत असल्याची माहिती तपासात मिळाली हाेती. त्यानंतर पोलिसांनी खडकीत सापळा लावून त्याला पकडले. त्याच्या चौकशीत साथीदार सुमीत डेडवाल, अक्षय महेर हे पिंपरीत भाड्याच्या सदनिकेत राहत असल्याची माहिती मिळाली. वर्मा, डेडवाल, महेर यांनी सदनिकेत हायड्रोपोनिक गांजाची लागवड केल्याची माहिती मिळाल्यानंतर पोलीस उपायुक्त सोमय मुुंडे यांच्या मार्गदर्शनाखाली पिंपरीत छापा टाकला. वर्मा, डेडवाल, महेर यांच्या चौकशीत मलय डेलीवाला हा मुख्य असल्याची माहिती मिळाली. पोलिसांनी डेलीवाला, भोसले यांना मुंबईतून ताब्यात घेतले. गोव्यातील कारवाईत पोलिसांनी तीन कोटी ४५ लाखांचे अमली पदार्थ जप्त केले.पोलीस आयुक्त अमितेश कुमार, सहआयुक्त रंजनकुमार शर्मा, उपायुक्त सोमय मुंडे, सहायक आयुक्त विठ्ठल दबडे, खडकी पोलीस ठाण्याचे वरिष्ठ पोलीस निरीक्षक विक्रमसिंह कदम, गुन्हे शाखेचे निरीक्षक किरण गायकवाड, उपनिरीक्षक दिग्विजय चौगले, बाणेर पोलीस ठाण्याचे वरिष्ठ पोलीस निरीक्षक चंद्रशेखर सावंत, पोलीस कर्मचारी भोरे, अमली पदार्थ विरोधी पथकाचे पोलीस निरीक्षक सुदर्शन गायकवाड, पोलीस निरीक्षक प्रशांत अन्नछत्रे, खंडणी विरोधी पथकाच्या पोलीस निरीक्षक वर्षा देशमुख, सहायक पोलीस निरीक्षक नितीनकुमार नाईक, जाधव, दिनेश भारकड, उपनिरीक्षक वैभव पाटील, विराज शिंदे (सहारा पोलीस ठाणे, मुंबई) यांनी ही कारवाई केली.
