प्रभात वृत्तसेवा पुणे – ससून रुग्णालयात उपचार घेत असलेल्यावर तलवार, कोयता आणि पिस्तुलाच्या साहाय्याने जीवघेणा हल्ला करून फरार झालेल्या सराईत आरोपीला बंडगार्डन पोलिसांना अटक केली. गेल्या तीन वर्षांपासून तो पोलिसांना गुंगारा देत होता.तम्मा उर्फ रोहीत सुरेश धोत्रे (२६, रा. वडारवाडी) असे आरोपीचे नाव आहे. याप्रकरणी तुषार हनुमंत हंबीर ( ३५, रा. हडपसर) याने फिर्याद दिली होती. हंबीर हा रेकॉर्डवरील गुन्हेगार असून लोणी काळभोर पोलीस ठाण्यातील गुन्ह्यात येरवडा कारागृहात शिक्षा भोगत होता. चालता येत नसल्याने उपचारासाठी २५ ऑगस्ट २०२२ रोजी त्याला ससूनमध्ये दाखल केले होते. त्या ठिकाणी मुख्यालयाकडून पोलीस गार्डची नेमणूक झाली होती. असे असतानाही ससूनमध्ये तिसर्या मजल्यावर ५ जणांनी प्रवेश करून हंबीरला जीवे मारण्याच्या उद्देशाने तलवार, कोयत्याने हल्ला केला.फिर्यादीला वाचविण्यासाठी पुढे सरसावलेल्या पोलीस गार्ड तसेच फिर्यादीच्या मेव्हण्याच्या हातावर वार करून त्यांना जखमी केले. यावेळी एका आरोपीने पिस्तुलातून गोळी झाडण्याचा प्रयत्न केला. यानंतर हल्लेखोर घटनास्थळावरून पसार झाले. त्यानंतर पोलिसांनी १२ आरोपी निष्पन्न करून ११ जणांना अटक केली. त्यांच्यावर मोक्का लावला. मात्र, गुन्हा घडल्यापासून धोत्रे हा फरार होता. सहाय्यक पोलीस आयुक्त संगिता शिंदे अल्फोन्सो आणि वरिष्ठ पोलीस निरीक्षक संतोष पांढरे यांच्या मार्गदर्शनाखाली तपास पथकाने आरोपीचा शोध सुरू ठेवला. या दरम्यान आरोपी हा केसनंद भागात असल्याची माहिती अंमलदार ज्ञाना बडे आणि मनोज भोकरे यांना मिळाली. त्यानुसार पथकाने सापळा रचून धोत्रेला ताब्यात घेतले.
