Pune Accident – कोरेगाव मूळ ग्रामपंचायत हद्दीतील पुणे-सोलापूर महामार्ग प्रयागधाम फाट्याजवळ शुक्रवारी (दि. 23) पहाटे साडेसहा वाजण्याच्या सुमारास स्कॉर्पिओ गाडीचा भीषण अपघात झाला. या अपघातात एकाचा जागीच मृत्यू झाला असून तीन जण गंभीर जखमी झाले आहेत.स्कॉर्पिओ गाडीवरील (एमएच 42 बीएस 3855) चालकाचा ताबा सुटल्याने गाडी रस्त्याच्या कडेला असलेल्या झाडावर जोरात आदळली. धडकेची तीव्रता इतकी होती की स्कॉर्पिओ पूर्णपणे चक्काचूर झाली. अपघाताचा मोठा आवाज ऐकून परिसरातील नागरिकांनी घटनास्थळी धाव घेत मदतकार्य सुरू केले. मात्र गाडीतील प्रवासी आत अडकून पडले होते. या अपघातात गोरख त्र्यंबक माने (रा. कंधर, ता. करमाळा, जि. सोलापूर) यांचा जागीच मृत्यू झाला. तर अलिकेश खान (रा. बिहार), विजय सूर्यकांत माने (रा. कंधर, ता. करमाळा) आणि समाधान अंकुश बाबर (वय 25, रा. कुगाव, ता. करमाळा) हे तिघे गंभीर जखमी झाले आहेत. जखमी माने व खान हे व्यावसायिक भागीदार असून केळी निर्यात व्यवसायासंदर्भात बैठकीसाठी 22 जानेवारी रोजी मुंबई येथे गेले होते. बैठक आटोपल्यानंतर 23 जानेवारी रोजी पहाटे करमाळ्याकडे परत येत असताना हा अपघात झाला. या प्रकरणी जखमी समाधान बाबर यांनी चालक विजय माने यांच्याविरोधात निष्काळजीपणे व भरधाव वेगाने वाहन चालविल्याची तक्रार उरुळी कांचन पोलीस ठाण्यात दिली आहे. अपघाताची माहिती मिळताच कस्तुरी रुग्णवाहिकेचे चालक व स्थानिक नागरिकांनी तत्काळ मदतकार्य करून जखमींना उरुळी कांचन येथील खासगी रुग्णालयात दाखल केले. अपघातामुळे पुणे-सोलापूर महामार्गावर काही काळ वाहतूक ठप्प झाली होती. तब्बल तीन तास बघ्यांची गर्दी झाल्याने मोठी वाहतूक कोंडी निर्माण झाली. स्थानिक नागरिक श्रीकांत शेलार व किरण काकडे यांनी पुढाकार घेऊन वाहतूक सुरळीत केली. अपघातानंतर बराच वेळ पोलीस कर्मचारी घटनास्थळी नसल्याने नागरिकांनी नाराजी व्यक्त केली.
