नाशिक : नाशिकमधील सप्तशृंगीगड येथील गणपती घाटात इनोव्हा कार १००० ते १२०० फुट खोल दरीत कोसळून भीषण अपघात झाल्याची घटना घडली आहे. मृतांमध्ये दोन महिला व तीन पुरुषांचा समावेश आहे. अद्याप मृतदेहांची ओळख पटली नसून, मृतदेह दरीतून बाहेर काढले जात आहेत. दरम्यान सदर इनोव्हा कारमध्ये एकूण सात प्रवाशी होते. त्यापैकी पाच जणांचा मृत्यू झाला आहे. मिळालेल्या माहितीनुसार, आज दुपारी सप्तशृंगी गडावर दर्शनासाठी जात असताना वाहन (एमएच १५ बीएन ०५५५) खोल दरीत कोसळून अपघात झाला. एका वाहनाला ओव्हरटेक करताना वाहनचालकाचे नियंत्रण सुटल्याने वाहन कठडयाला धडकले. मात्र, कठडे कमकुवत असल्याने कार कठडे तोडून दरीत कोसळली. यात पाच जणांचा मृत्यू झाला असून अन्य दोघे जखमी झाले आहेत. या जखमींना जवळच्या रुग्णालयात उपचारासाठी दाखल करण्यात आले आहे. हे प्रवासी पिंपळगाव चिंचखेड येथील असल्याची प्राथमिक माहिती आहे. हा अपघात गणपती पॉईंटजवळ घडला आहे. याबाबत माहिती कळताच सप्तशृंगी निवासिनी देवी ट्रस्टच्या दोन रुग्णवाहिकांसह आपत्ती व्यवस्थापन दलाचे पथक घटनास्थळी रवाना झाले आहे. तसेच स्थानिक नागरिक आणि आपत्ती व्यवस्थापन पथकांकडून बचाव मोहिम सुरु आहे. घाटाच्या सरंक्षक भितींचे काही अपूर्ण असल्यामुळे हा अपघात घडल्याचे स्थानिक नागरिकांनी म्हटले आहे. तसेच सार्वजनिक बांधकाम विभागाच्या कामकाजावरही ग्रामस्थांनी नाराजी व्यक्त केली आहे.
