प्रभात वृत्तसेवा शिक्रापूर – पोलीस भरती प्रक्रियेसाठी दुचाकीवरून जात असलेल्या दोन मित्रांना पाठीमागून आलेल्या अज्ञात वाहनाने जोरदार धडक दिल्याने झालेल्या भीषण अपघातात एक युवक ठार, तर एक युवक गंभीर जखमी झाला. हा अपघात कोरेगाव भीमा (ता. शिरूर) येथील पुणे-नगर महामार्गावरील वाडागाव फाटा परिसरात घडला. याप्रकरणी शिक्रापूर पोलीस ठाण्यात अज्ञात वाहन चालकाविरोधात गुन्हा दाखल करण्यात आला आहे. मृत युवकाचे नाव उबेद सलीम शेख (वय 22, रा. नागापूर एमआयडीसी, अहिल्यानगर) असे असून, गंभीर जखमी युवकाचे नाव शिवसागर अरुण आदिक (वय 21, रा. खानापूर, ता. श्रीरामपूर, जि. अहिल्यानगर) असे आहे. मिळालेल्या माहितीनुसार, उबेद शेख व शिवसागर आदिक हे दोघे मित्र दुचाकीवरून (एमएच 15 ईएल 8688) पोलीस भरती प्रक्रियेसाठी जात असताना, पाठीमागून भरधाव वेगाने आलेल्या अज्ञात वाहनाने त्यांच्या दुचाकीला धडक दिली. या अपघातात दोघेही गंभीर जखमी झाले. त्यामध्ये उबेद शेख यांचा जागीच मृत्यू झाला, तर शिवसागर आदिक यांच्यावर उपचार सुरू आहेत. अपघातानंतर संबंधित अज्ञात वाहन चालक वाहनासह घटनास्थळावरून फरार झाला. याबाबत सलीम दस्तगीर शेख (वय 51, रा. संगमनेर रोड, श्रीरामपूर, जि. अहिल्यानगर) यांनी शिक्रापूर पोलीस ठाण्यात फिर्याद दिली आहे.
